แจแแ
แแฅแแ แจแแแแแจแฐแ แตแฉแจแต แซแแฐแฐแ แแ แฐแธแแ แจแแ แจแแ แฅแ แจแ
แแแต แแชแแฝ፣ แ แแญแแต แซแแตแ แจแแฑแตแ፣ แจแแซแ แจแฐแฃแจแฉ แ แแซแญแ แแณแฉ แแฐ แแญ แฅแแณแญแแฃ แฐแณแแ แฅแแฒแแญ แจแฃแต แฅแจแต แฅแซแฐแจแแ แต แซแแแ แแ።
แ แ
แแแต แจแฐแแธแแ แฅแแแฐแ แณแชแญแ แ แฐแแ แแแแแฝ፣ แจแ
แแแต แ แแซแญ แ แขแตแฎแตแซ แแแซแฝแ แ แแแ แฅแจแแแแต แจแแแแ แแ แ แแแฝ แฐแฝแ แจแแซแ แฅแแญ แณแชแญ แแแแฅ แจแแแญแฅแ แต แแ แฉแ
แ แญแแแ። แ แแแ แฅแจแแจแ แแ።
แฐแแตแ แแญแแต แ
แแข แตแแซแญ (แฐแแ
แต) แแตแแ แจแฐแฐแแซแ แ แจแซแฒแต 11 แแ 1967 แฐแฐแขแต แ แจแ แฅแแฐแแธแ แแแฅแญ แแตแแตแฒ แฅแแจ แตแแซแญ (แแแฅแต) แจแฐแแแแ แแฎแแซแ แจแฐแจแจแ แ แฐแแ
แต แแญแ แจแแฌแ แตแ แแแแต แแ።
แฐแแ
แต แตแแแ แ แแแจแ แต แแ
แต แฅแแต แจแแ แฉแต แณแแฎแฝ แแแฉแ แญแฝแแ แฅแ แจแแจแฃแธแ แแซแจแ፤ 1. แ แจแแ แ แญแ፣ แแแแแ แญ 2. แแญแก แแฐแฐ 3. แแฐแญ แแญแ แฝแฎแ 4. แแฐแฐแ แ แจแ 5. แ แฃแญ แแแจ 6. แฅแฉแ แแตแแ 7. แ แแแฐแแต แแแแป 8. แ แตแแ แแแต แฐแแญแ แ แฐแแ
แตแ แแญแฐแแ።
แ แแ
แแ แแ แญ แจแแแฅแตแ แแญแต แฐแแ
แต แฐแจแจแ แ แฅแ แ แแแ แจแแ แจ แณแแญ แฐแตแณแแ แจแแแธแ። แแญแต แแแต แแฎแแซแ แแ። แ แแแ แจแแ แจ แแแ แณแแญ แแ แจแแฎแแซแแ แญแแตแ แแแแตแฑแ แ แซแแ
แ แแ แญ። แญแ
แแฎแแซแ แแ แญ แ 1968 แแต แ แแตแ แฐแแ
แตแ แแแแต แจแแฐแแ แ
แ แฐแ แจแแ แจแ แต።
แจแฐแแ
แต-แ
แแแต แจแแแแชแซ แแฐแแฅแ
แฐแแ
แต แแ แจแฐแฐแขแต แ แจแ แณแญแแฃ แ แแต แ แแแต แแซ แจแฐแฐแแ แแ แต แแ
แต แแ። แญแ
แ แแจแแแ แจแแ แจแ แจแแฎแแซแ แฃแแคแต แแ แจแแ แ แแซแญ แ แตแฅแ
แ แจแณแแ แณแแฎแฝ แแญ แ แแฐแฃแ แญ แแตแฅ แแแตแฅ แแฎแแซแ แญแแแ
แแ แญ። แญแ
แ แจแแญแฐแแแ แจแแแแ แ แแซแญแ แแ แฉ።
แ แญแซแชแ แ แ แแแธแ แจแธแ แแ แแฎแแซแ แ แตแญแญแ แจแฐแแแ แแแ แจแตแแซแญ แแแฅ แแแตแ แแแแตแ แ แญแฅแฅ แซแตแแแ ፤ แตแแซแญแ แฅแ แแแงแ แจแ แแซแ แ
แ แ แแแ แแ แจแแซแแฃ፣ แจแตแแแฝแ แแญแ
แแฎแแซแ แแ แ แ። แจแแ
แฐแณแณแแแฝ፤ 1. แ แจแแ แ แญแ 2፣ แ แฃแญ แแแจ 3. แฅแฉแ แแตแแ 4. แแฐแญ แแซแฝแฎแ 5. แตแฅแแต แแ 6. แแแต แแแ 7. แ แตแแ แแแต 8. แ แแ แแ แแแฑ 9. แตแจ แ แฅแญแ 10. แแญแ แแแแป แแธแ። แฅแแแ
แแ แ แแซแญ แจแแ แฉแ แฅแแถแน แฐแแ แจแ แแต แแแต แ แแ แแฐ แ แแซแญ แจแแก แแธแ።
แ แแแฐแ แฐแจแ แ แฐแแแ แจแแแตแ แแฎแแซแ แ แฃแ แ แฐแแ፣ แขแตแฎแตแซแ แจแแซแแญแต፣ แแแฅ แ แณแ፣ แธแจ-แแแฅแ แธแจ-แขแตแฎแตแซ แแ แแแแต แแ แ แแแต แจแฐแแฑแต แฐแแ 1. แแฐแฐแ แ แจแ 2. แ แแ แ แแฐแฐ 3. แ แฝแฅแ แณแแ 4. แถ/แญ แ แณแญแแต แแธแ แฒแแ፣ แจแปแฅแขแซ แแฅแถ แฐแแ
แตแ แจแฐแแแแแ แแแช (แแด) แฐแญแแ 5แ แแ แจแแแฐแฐแ แ แจแ แแญ แฐแแแแ። แฅแแแ
แแแ แจแฐแแ
แต แ แแซแญ แจแแ แฉ แแธแ።
แแ
แ แญ แแตแแตแฒ แฅแแจ แตแแซแญ (แแแฅแต) แแ แฒแแ แญ แแฃแฃ፣ แธแจ-แขแตแฎแตแซแ แธแจ-แแแฅ แแ แแ แจแฐแแฐแจแฐแ። แญแ
แแ แแญแต แซแตแจแจแ แ แแฐแแ
แต แ แจแซแฒแต แแญ 1967 แแ። แ แฐแฐแขแต แ แจแ แฐแ แแญแฎ แแฎแแซแ แแ። แจแแ
แแ แแแฎ แแฎแแซแแ แ แแแแ แจแฐแฐแแแต แซแแฑแต แแฅแฅ፤
- แฐแแ
แต แ แธแจ แขแตแฎแตแซแ แ แแแง แฐแแแ
แถ แแแ แฉ แขแตแฎแตแซ แจแแตแฃแแแ แแแญ แแ แณแฐแ แ แแฃแต แจแแแ แ แแฝ 8 แจแฐแแแแ แจแฃแฅแณแ แดแซแ แธแจ แแแญ แแ፣
- แ แแซ แจแตแแซแญ แแแฅ แจแแแ แจแแญ፤ แแตแ
แแต፣ แแฝแญแแฅแ፣ แแตแฐแต፣ แแแจแซ แจแณแจแแต แ แแต แแ แจแแแ แตแแฐแ แแ
แแต แจแแแ แจแแ แซ แแฌ แแ። แจแฐแปแแ แ แแซแ แแ แฅแ แแแฅแแต แแ። แญแ
แ แจแแฎแแซแ แแแแต แ แแ แต፣
- แคแญแตแซ แจแ แแซแ (แขแตแฎแตแซ) แ
แ แแแต แแต แจแแแ แ
แแฃแต แณแ
แ แแ
แแต แจแแแ แฅแแแฐ แ แแจแญ แจแแ แซแฝแแต แจแฐแแแฃแญ แแแ แแ፣
- แตแแซแญ แจแ แแซ แ
แ แแแต แแต แแแต แจแ แฅแแฎ แตแ
แแตแ แ แฃแฅ แแจแแแต แแ፣ แตแแแแ แแแแ แ แแ แต።
- แฐแแ
แต แจแขแตแฎแตแซ แฅแแณแแ แณแชแซแ แแแตแแ แฅแ แจแฃแแญ แ แฏแ แจแแซแตแแฅแ
แแฎแแซแ แแ። แตแแแแ แธแจ-แขแตแฎแตแซ แแ แแแแต แแ። แแฎแแซแ แญแแแฅ แแแฐ. แจแแ แแณแฆแฝ แ แแแแณแแต แแชแ แณแแญแ แจแฅแแแฐแฐแ แ แจแแ แแณแฅ แแฐแแแ แ แแ
แฑ แจแแ แฉ แณแแฎแฝ แ แตแญแญแ แฐแแแจแแณแ።
แ แฐแจแแชแ แ แฝแฅแ แณแแ፣ แถ/แญ แ แณแญแแต แแธแ แจแจแแฉแ แต แแฅแฅ แฐแแ
แต แ แตแแซแญ แแแฅ แฐแแฃแญแแต แแญแ แจแแญแแ แแฐแจแต แจแแแ፣ แแฎแแซแแ แ แตแแซแญ แแแฅ แตแ แแแญแแต แ แแฃแฅแแต แจแแแ፣ แ แแแฅ แตแ แแญแ แญแ แญ แแ แฅแแ แ แแแ แ แแ
แฑ แจแแ แฉ แ แแตแฐแ แณแแฎแฝ แ แแ
แแณแฅ แฐแตแแ። แ แแ
แแ 1. แ แตแฅแแต แแ 2. แแแต แแแ 3. แ แแ แแ แแแฑ 4. แตแจ แ แฅแญแ แแแฐ. แฐแฃแฅแจแ แ แ แถ แแฐแฐแ แ แจแ แแญ แจแตแ แแฅแแต แแแป แแแฉ። แ แตแฅแแต แแ แฅแจแฐแแฉ แจแแฐแฐแ แ แจแแ แตแแ แแ แ แฅแแญ แแแ แแกแต። แปแฅแขแซแ แแฐแฐแ แจแฐแแ
แต แฐแแแ
แ แแณแแแ แจแแแแชแซแ แซแแฐแแ แแ แตแแต แแตแฅ แตแแฃแแ แแ። แปแฅแขแซ แแฐแแ
แต แ แแซแญ แซแตแฐแแแแ แแแฅแญแต፣ แแฐแฐแ แ แจแ แ แแ
แจแแ แ แฐแแ
แตแ แแ แปแฅแขแซ แตแแ
แ แฐแ แแญ แฅแแฐแแแตแ แฐแแแฏแ። แแฐแฐแ แ แจแ แจแแตแจ แแฝ แแฅแแต แ แแ แต แจแแแแ แจแฐแ
แแต แฅแแต แ แแซแญ แแณแกแ แฐแแ แแต።
แจแฅแ แตแฅแแต แแ แกแตแ แ แแฐแฐแ แ แจแ แแญ แฒแซแตแแแต แจแแ แจแแ แจแตแ แแฅแแต แแแป แฅแแฑแ แฅแแแแจแต፤
- แตแญแ
แณแฝแ แฐแแ
แต แจแแฐแฐแ แ แจแ แแแณแ แตแญแ
แต แแ แฅแจแฐแฃแ แแ። แญแ
แแ แแแฐแฅ แจแตแญแ
แฑ แแตแแแต แตแแแฅแ แฅแแฐแฃแ แญ (แแแต แแแ)፣
- แแฐแฐแ แ แจแ แแแณแ፣ แธแจ-แตแแซแญ แตแแ แ แแแ แ แฐแแธแ แแ แ แฅแ แฐแแ
แตแ แจแแฃแแต แ แญแแแตแ። แจแตแแซแญแ แแ แแแญแแตแ แจแตแแซแญแ แแแแฅแต แ แญแแ แแ። แธแจ-แคแญแตแซ แตแแ แแ። แจแแตแจแ แ แแซแฝแ แปแฅแขแซแ แฐแแจแแ แณแ። (แตแฅแแต แแ)፣
- แคแญแตแซแ แตแแซแญ แจแ แแซ แ
แ แแแต แ แญแฐแแ፣ แ แแแ แฉแ። แแแ แจแขแตแฎแตแซ แฅแแณแ แแแตแ แ แซแ แแธแ፣ แตแแแ
แจแฐแแ
แต แแฎแแซแ แแตแ
แแ แฅแซแ แฅแแฐ แแตแฅ แแตแฅ แแแตแฅ แฅแจแฐแฝแแจแแจ แจแแแฅ แฅแจแแ แแ แแ (แตแฅแแต แแ)።
แ แแ
แแ แจแแ แฉ แณแแฎแฝ แฅแแฐแแแแฉแต แจแแ แ แแฐแฐแ แ แจแ แแญ แ แตแฅแแต แแแ แแแต แแแ แจแแแซแ แกแตแ แจแฐแฐแแฉแ แต แจแตแ แแฅแแต แแแป แ แจแแ แญแฐแญแฐแ แแ แญ። แ แแจแจแป แฐแแฎ แ แ
แณแญ 1968 แจแ/แฎแแด แแแแแฑ แซแฑแ แ แแแแ። แญแ
แ แแแ แ แแแ แฅแ แ แแญแต แจแแแแฉ แ แแ
แฑ แจแแ แฉ แณแแฎแฝ แแ แฉ። แ แญแซแชแแ แ แแซแญ แแแแฃแ แญ แ แ
แ แแ แจแ แแ แตแ
แฐแต แแธแแ แซแแ แ แแณแกแ።
แจแฒแ แฎแแแจแแต
แจแฒแ แฎแแแจแแต แจแฐแซแแตแ แ แแแขแต แแแแชแซ แ 1968 แแ แญ። แ แแ
แแ แ แถ แแฐแฐแ แ แจแ แ แตแฅแฐแฃแ แ แแณแจแ። แ แแ
แฑ แ แแ
แแฃแค แจแฐแณแฐแแต แณแแฎแฝ แแฐแฐแ/แตแแ แจแต แแฐ แฅแแ แฒแ แญแ แจแฐแฐแ แ แแแต แ แฅแซ แแญแแซแต แแฐ แฉแ
แฆแณ แแทแ แจแแ แฅแแฐแแ แญ แญแแแซแ። แฎแแแจแแฑ แจแแตแจแฑ แ แแต แจแตแฅแแต แแ แกแตแ แ แ แแ แ แแฐแฐ፣ แ แฅแแฑแ แขแแ แ แแฐแญ แแญแ แฝแฎแ แแญ แจแตแ แแฅแแต แแแป แ แซแแฐแแ። แแแญ แแ แแคแต แ แแฃ แแ แญ።
แ แฒแ แฎแแแจแแต แจแฐแแจแกแต 1. แ แจแแ แ แญแ፣ แจแฐแแ
แต แแแแแ แญ 2. แตแฅแแต แแ 3. แแฐแญ แแญแ แฝแฎแ 4. แฅแฉแ แแตแแ 5. แ แแ แ แแฐแฐ 6. แ แฃแญ แแแจ 7. แแด (แแแช) แฐแญแ แแ แฉ። แแญแซแ แธแจ-แฒแแญแซแฒ แตแแแ แญ แจแแ แจแ แ แแซแญ แตแฅแแต แแแ แแญแฆ แแแต แแแแ แตแแฝ แแณแ። แ แแ แแแ แแฐแจแฅแซแ แแฐ።
แแฐแ แฅแฌ แ แ แญแฅแตแฑ แแแณแแต แฅแซแ แแแต แแแตแ แต፣ แจแฐแแ
แต – แ
แแแต แธแจ-แขแตแฎแตแซ แ แซแแตแ แแแแ แ แแแแ แแแแต แแฐแแ แแ แจแแญแแต แแตแแฅแตแแต แจแจแแ แ แแซแญ แแ แฉ แแญ? แจแแ แฉแต แฅแแแ แแธแ? แแแแ แฐแแขแแ แแแฝ แแแตแ แต แฅแแ แแถแแซแแธแแ แจแแ
แ แแซแซแ แ แแญแฃแแ።
แแฐแฐแ แ แจแ แ แแ แ แแฐแฐ แแด แแแช แฐแญแ แ แฝแฅแ แณแแ แถ/แญ แ แณแญแแต แแธแ
แ แถ แแฐแฐแ แ แจแ แจแ แจแ แตแ แตแแ፣ แฐแแแถ แซแฐแแ แฝแฌ แ แแซแ แแ። แแ แ แแฃแตแแฑ แจแฝแฌ แ แแซแ แแแแ แคแต แแ แนแ แ แแแ แ แแแแแ። แ 1950 แ แแแฝ แแแญแแ แแญแซ แฐแแณแตแฎ แ แแธแแ แจแขแตแฎแตแซ แแญแแ แ แฃแ แ แแแ แ แญแทแ። แแถแตแต แฐแจแณแณแญ แแญแซ แ แแธแแ 15 แแแต แแ แจแแญแแ แ แฃแ แแ แญ። แ แขแตแฎแตแซ แจแฐแแฃแ แแ แ แฅแฎแต แฅแจแฐแ แแจแจ แฒแแฃ แ 1966 แจแแแฅแต แ แฃแ แแ።
แ แถ แแฐแฐแ แ แจแ แจแแแฅแตแ แ แแ፣ แฐแแฃแญแ แแฎแแซแ แ แธแจ-แขแตแฎแตแซแแต แจแฐแแ แแแแ แตแฉแจแต แณแญแฐแฅ แ แจแซแฒแต 11 แแ 1967 แแฐแแฐแจแฐแ แจแตแฅแ
แตแแ แแแฃแญ แแฐแ แแตแซแฝ แ แแแ แ แ แแซแญ แฐแจแ แแแฃแฉแ แฒแแซ แแ แญ። แจแฐแแ
แตแ แแถแแซแแ แแแ แซแจ แ แแ แแนแ แธแจ-แขแตแฎแตแซ แ แแตแแตแ แแ แแแแต፣ แธแจ-แขแตแฎแตแซ แแแฅแแตแ แจแจแ แ แแฎแแซแแ แ แแฝแตแต แฃแแซแ แจแฐแแแ แแ แฅแตแจแแแต แฐแจแฐ። แ แ
แณแญ 1968 แจแ แแซแฉ แแจแฐ።
แ แถ แแฐแฐแ แ แจแ แซแแณแ แฐแแแ แฅแ แขแแแ แจแฐแซ แแฅแญ 1-4 แซแแตแ แ แแณแญ แแณแฆแฝ แ แตแแตแทแ። แณแแฉแ แตแแ แฐแ แ። แจแ แแซแฉแ แฅแแฐแ แ แแ แ แแฐแฐ፣ แ แฝแฅแ แณแแ፣ แถ/แญ แ แณแญแแต แแธแแ แแแช แจแแ แฐแฐแแ። แ แฐแแ
แต แแตแฅแ แญแแแตแ แฝแฅแญ แ แ แแซแฉ แแตแฅ แฐแแ แจ። แ แตแฅแแต แแ แจแแแซแ แกแตแแ แแฐแฐแ แ แจแแ แ แแด แแแฅแแต แฅแ
แฑแ แแจแ።
แจแแฐแฐแ แ แจแ แฐแฅแ แแฅแแต
แจแฒแ แฎแแแจแแต แ แแแ แญแแ แตแแฝ แแฐแ แฅแ แแฐแฐแ แ แจแ แจแแ แฝแณ แแ แแจ แฒแ แจแต แแฃ แจแแ แณแแฎแฝแ แ แ። แ แแ
แแ แจแฐแแ
แต แ แแซแญ แฅแญแต แ แญแฑ แจแแแญ แแฌแแฝ แ แตแญแ
แฑ แ แฐแซแจ።
- แ แ แฒ แแฅแซแกแต แแตแฅ แ แขแฒแฉ แแญแ แ แญแแแต แตแแแฐแ แฆแญแแต แจแแฐแ แ แญแแแต แแฐแแฝแ፣
- แฅแ แตแแธแแแแฉ แ แแณแแแ แแแแฅ แตแกแแ แฑแณแ แแ แแแญ แ แแแต แแแแฅ แจแตแญแ
แฑ แฐแฐแฅแถแต แ แแชแ แฐแณแแฎ แฒแแต แ แแชแ แแตแฅ แจแแ แฉ แจแขแฒแฉ แ แฃแแต แแฐแแต แจแแ แแ แญ። แแแ แแธแต แแ።
แขแฒแฉแ แญแ
แแ แ แฐแแแจแฐ แฐแ แแแแซ แ แฐแ። แแฐแฐแ แ แจแแ แฅแ แ แแแฐแแแแ፣ แแแแตแแแ แ แแฝแแ። แจแแแตแแปแพแฝ แฐแ แ แจแแฑ แ แแแตแ แจแแ แฒแแ፣ แจแแฐแแฝแ แฐแแ
แต แแต แ แ።
แ แ แฒ แแฅแซแกแต แฐแแฐแ แจแฐแฃแแ แต แแญแแซแต แแแก แซแฑ แแตแญแญแแฑแ แ แฐแ แ แต แ แแแขแต แแญ แฆแญแแต แ แแแ แจแ። แจแฐแ แแแฐแต แ แแณแจแ แ แ። แจแแฐแแต แซแณแธแ แแซแแแฝ แแธแ แฒแ แแแก แแตแญแญแแฑแ แฐแ ። แ แฒ แแฅแซแกแต แจแแฐแฐแ แ แจแ แคแต แแ። แแแ แจแ แถ แแฐแฐแ แ แจแ แตแแ แ แแแต แฅแแแฑ แแแฝ แแ แจแแฃแ แต แแ แแ แญ። แแฐแฐแ แ แตแฅแแต แแ แจแแแซแ แจแฐแแ
แต แ แแซแญ แ แแญแณแแ
แฆแณ แฐแฅแแ แแญแ แฅแแฐ แแแฐแ แ แแญแฐแ แ แฐแ 1968 แ แฅแญแต แฐแฅแฐแ แ แฝแแ แกแแ แต แ แซแฃแข แฐแแฐแ። แ แแตแซแ แจแฐแณแฐแแตแ แ แแ แแ แแแฑแ แ แฐแ แแ แฒแแ แแชแแน แแ แ แแณแแแ። แญแ
แแ แฅแแแณ แฐแจแณแตแแ แแแ แซแแแต แ แฐแแ
แต แแตแฅ แแตแแ แจแฐแฐแแแต แจแแฐแฐแ แ แจแ แจแ
แญแฅ แแแถแน แแธแ። แ แแแ แแแ แ แตแแแ แ แ แแ። แแฐแจแแต แฅแจแต แจแแแฐแแแ แฃแแแแณแ แแธแ። แฅแแถแน፣ แแแตแ แฅแแฐแ แ แแแ แ/แปแฒแ
แณแแแ แจแต แฅแแฐแแก แจแแญแณแแแ แ แ።
แจแ แถ แแฐแฐแ แ แจแ แ แฐแแ
แต แแฎแแซแ แซแตแแแ แ แแแแณแ แแณแกแ แจแฐแแแต แแแฐแฆแฝ แ แจแแฐแ แฒแแช แจแ. แ. แฅ. แฉแแจแญแฒแฒ แจแฐแแจแ แฅแแฐแ แฅแแฃแแ แ แจแ፣ แ แฐแ แแฅแจแแ
แต แจแแณแฐแ แแ แ แแแซแ แจแฐแแ
แตแ แ แแซแญ แจแแธแต แตแ แ แแตแ แต แจแฅแแฃแ แฑแฐแแฝ แฐแฅแแ แฝแซแฎ แแตแฅ แ แฅแญแต แฐแฐแฅแตแ แ แฐแแตแแแ። แฅแแแ
แ แ แฐแแ
แต แ แแซแญ แ
แฅแซแ แฃแแณแแฝ แฐแแตแแแ። แญแแ แฅแ แแแฅแญแณแธแแ แ แตแฐแแแแ แจแแฝ แแแ แ แแ แฐแแตแแ แ แแแแ። แตแแธแ แแ แ แแ แแ፤ แแแแแ แญแแซแ።
2. แแญแก แแฐแฐ
แแญแก แแฐแฐ แจแ แจแ แตแ แ แแ แ แฒแแ፣ แ แ. แ. แฅ. แฉแแจแญแฒแฒ แจ4แ แแแต แจแแแฒแซแ แณแญแแต แฐแแช แแ แญ። แแแฅแตแ แจแแฐแจแฑแต แ แแฑ แแ። แ แ แแซแญแ แฅแตแญ แฅแแฐ แแฑ แฐแแ
แตแ แจแแแฉแต แแซแจแ แแ แญ። แแญแก แแฐแฐแ แ แถ แแฐแฐแ แ แจแ แ แฐแแ
แต แแฎแแซแ แ แแแแต፣ แธแจ-แขแตแฎแตแซแ แธแจ-แขแตแฎแตแซ แแแฅ แแแ แ แแแ แแฅแฅ แ แญแแซแฉแ፣ แ แแต แ แแ แแ แซแธแ።
แแญแก แแฐแฐ แจแฐแแ
แตแ แแฎแแซแ แ แฅแฅแ แซแแแแแ፣ แ แณแแฉแ แแแต แจแแฐแ แฐแแฃแญแแตแ แญแฅแญแ แซแแ แ แแซแญ แแ แญ። แญแ
แฝ แแ แแแตแฅแแต แแ፣ แ แฃแญ แแแจ፣ แตแฉแ แแตแแ แฅแ แแแต แแแ แ แตแแฅแแธแแ። แ แฐแแ แแช แฅแแ แแญแแ แจแแ แ แแ แแญ แฅแแฐ แแฐแฐแ แ แจแ แ แแด แแฅแแต แแ แญ።
แแญแก แแฐแฐ แ แฐแแ
แต แแฎแแซแ แ แแฝ 8 แแญ แจแฐแแจแแ แฅแ แแแแ แแฎแแซแ แแ แ แฐแแ แตแแแ แแฝแ แแแแต แ แแ แต แ แแแต แจแฅแ แ แแซแฎแฝ แแญ แแแแแฉ แจแ
แญแฅ แฐแแฝ แจแแแต แแ
แแ แญ። แแแญ แแ แฐแ แ แแแแ። แฅแ แตแฅแแต แแ แจแแแฐแแ แตแ แแด แแแแปแธแต แญแฏแฏแก แแ แญ።
แ แแ แ แแฐแฐ แจแแฐแญ แแญแ แฝแฎแ แฅแ แจแ แจแแ แ แญแ แแญ แฅแฉ แแแแแต แฅแแฐแแ แซแธแ แจแแซแแ แณแแฎแฝ แ แแ แดแซ แแแฑ แแแ แแญแแต แฐแณแณแแแต แ แแแ แจแฃแฝแแ แจแแแ แฅแ แแธแ። แจแดแซแ แ แซแแต แตแฅแแต แแ፣ แแแต แแแ፣ แ แฃแญ แแแจ፣ แตแฉแ แแตแแ፣ แ แแ แแ แแแฑแ แตแจ แ แฅแญแ แแธแ แ แแแต แซแจแแแฃแ።
แญแ
แ แฅแแฒแ
แฅแซแ แจแฐแแ
แต แ แแซแญ แตแฅแแต แแแ แ แฃแญ แแแจ แแแ แแดแแ แ แแแฃแฅแจแ แจแจแจแฑ፣ แ แแ แแ แจแแฎ แ แ แญแฑแ แจแฐแ แตแแ
แฅแซ แฅแแณแ แ แตแแตแแ แแณแฃแธแแ แ แแ
แจแฅ แจแแแธแแแ แ แ แแซแญ แฐแจแ แตแแแ แ แแ แ แฐแแแ
แฅแแ แ แตแแฝ แแแต แฅแแฐแแแแ แฐแแฐแ። แตแฅแแตแ แ แฃแญ แแแจ แ แแต แ แฅแแต แจแแแแ แต แแแแแณแแตแ แแ แแแแฑแ แแ แแ แ แแญแปแแ แต แฆแณ แแ
แฎ แแซแญ แแแ แ แแแฅ แแแแแต แฅแแต แ แแแฐแแ። แแ
แฎ แแซแญ แ แฐแญแ แแแบแซ แจแณแ แจ แแ። แแ แฐแจแฐ፣ แ แแ แ แแฐแฐแ แแแแต แฐแแฐแ
แ แฅแจแ แจแแตแฅแแต แแญ แฐแแ แ แแฃแ แฆแณ แฐแแแ። แตแฅแแต แแ แแ แแ แ แ แจแตแแ แฆแณ แแแแต แ แตแ แแ แฒแแ แ แแฐแฃแญ แณแฅแญ แ แฉแ แฒแแ แจแแจแฅแจแ แแแแต แ แฐแแ แแ แ แแแต แ แแแฅ แแแแแต แ แฅแแฐแ แแ
แฎ แแซแญ แแ แแแแ፣ แแแปแ แแ แจแฐแญแ แฐแซแแต แจแแแ แต แแ แซแแต แ แแ แ แ
แณแก แฐแตแแแฐแ แแแแณแธแแ แแ แ። แแแแต แฐแแฐแ
แ แฅแฎแต แตแแแ แจ แแแแ แฐแแถแณแ። แแ
แฎ แแซแญ แฅแแฐแแก แ แแแป แฐแจแ แ แ แฐแฐแฎแฐ แฅแญแต แ แแ แ แแฐแฐ แแฒแซแแ แแตแ แแฐ። แแปแแต แแ แ แแแ ። แฅแแฐแแแ แฅแ แแ แแจแณ แแฃ። แฅแ แแแแธแ แณแแฎแฝ แจแฐแจแฐแฃแธแแ แฒแแแซแธแ፣ แแแ แฅแฉ แแแแต แแ แฅแแ แตแฅแแตแ แ แฃแญ แแแจ แ แแ แแ แจแฐแแแฉแตแ แ แแ แ แแแป แฐแจแ แ แจแฅแญแต แแณ แแญแถแฅแ แ แแ แแ แแฐแแต፣ แฅแ แ แแแฅแฉ። แตแฅแแต แแแ แ แฃแญ แแแจ แฃแแแแต แจแแฐแซ แแด แจแแแแแธแแ แ แแ แ แแฐแฐแแ แ แ แแต แฅแ แจแฐแแแจแ แ แฐแแ
แต แแตแฅ แฐแฐแซแจ። แตแฅแแตแ แ แฃแญ แฐแจแณแตแแ แแแแตแ แแแแแต แจแฐแแ แจแ แแแญ แแแแ แฅแแณแญแแแญ แ แตแ แแแ። แแแ แแ แแแฉ แฐแฐแซแญแทแ። แ แแซแฉแ แจแ แแ แแ แแแณ แ แแฒแต แแแ แณแซแแณ แแญแถ แ 1แแ แแ แค แ แ แแต แฐแแฐแ แฅแแ แฐแแแฉ። แจแตแฅแแต แจแแตแซ แดแซแ แฐแแจแแต።
3. แแแช แฐแญแ
แแแช แฐแญแ แจแ แจแ แตแ แแด แแ። แ แ. แ. แฅ. แฉแแจแญแฒแฒ แจแแแฒแซแ แณแญแแต แฒแแญ แจแแจ፤ แจแปแฅแขแซ แแญ แจแฐแฐแแ แจแปแฅแขแซ แณแแญแ แ แแซแญ แจแแ แจ แฐแ แแ። แปแฅแขแซแ แแแฅแตแ แ แแญแ แ แต แจแฅแจแต แฐแแฐแแต แซแแซแแ แแแช แฐแญแ แแ። แแแฅแตแ แจแแฐแจแฑแต แฅแ แ แจแแ แ แญแ แ แฅแญ 1967 แณแ
แ แคแญแตแซ แ แจแ แแญแฐแ แ แปแฅแขแซ แแณแฐแซแ แตแแ
แญแต แฐแแฅแแ แฅแจแต แณแฅแแ แฐแฐแขแต แ แจแ แฅแแฒแแญแฑ แตแแ
แแ แจแฐแซแแฐแ แแแช แฐแญแ แแ። แแแช แฐแญแ แ แปแฅแขแซ แฐแแ
แถแแต แ แฐแแ
แต แแตแฅ แฅแแฒแณแแ แฐแฐแขแต แ แจแ แจแ แ แจแแ แ แญแ แฐแแแ
แ แจแฐแแ
แต แฐแแแ แแ።
แจแแด แซแแฐแ แ แ แจแ แแ แแแฅ
แแด แจแแแแ แณแแญ แฃแ
แช แฅแแต แแแแฐแต แฅแแต แแซแถแฝ แขแแตแตแ แตแ แจแฐแแ
แต แณแแญ แแแแ แแแฅ แแแ แแแแ แ แแ። แจแฅแ แแฐแฐแ แ แจแ แ แแ แ แแแฐ. แ แฐแแ
แต แแฎแแซแ แแญ แซแแธแแ แ แแแซแจแต แ แแ። แจแ แตแแฐ แ/แฅแแดแ แแญ แฅแฉ แแแแแต แแฐแจแฐ። แณแแฉแ แแด แแ
แฐแต แแ แฉ፣ แแฐแฑแตแ። แ แฒแ แฎแแแจแแต แแ แแซแญ แฅแ แแ แฅแ แณแแฉ แแฐ แฐแแ
แต แแชแแต แ แฐแจแฐแ። แ/แแณแฐแซแ แ แแฅแ แแ። แญแ
แ แแ
แฑ แแแ แจแ แณแแญ แณแแ
แตแ แแ แญ።
แแด แฃแแฐแ แ แ แแแณ แธแจ-แปแฅแขแซ แ แแ แซแ። แปแฅแขแซ แธแจ-แแแฅ፣ แ แฐแแญ แฐแแ แธแจ-แตแแซแญ แแแฅ แแ። แปแฅแขแซ แจแ แ แแต แจแตแแซแญ แแแฅ แแ แจแแ แ แญแซแช แตแญแ
แต แแ፤ แจแฐแแ
แต แ แแซแญ แฐแแ แปแฅแขแซแ แฅแแฐแแฃแช แฅแจแแ แฉ แ แแต แแณ แฅแแฉแ แญแตแแ แ แแแต แ แฐแ แแจแจ แแแฉ แธแจ-แปแฅแขแซ แ
แตแแณแแ แ แแแแฃแ แญ แ แตแแต แแ แแ แต፣ แณแแฉแ แ แฅแฎแต แแ።
แ แแซแฉแ แแด แจแแตแญแ แจแตแแแฝแ แ แแญ แปแฅแขแซ แฅแจแแซแจแ แแ แ แแแต แฒแแแฉ፣ แ แฅแแปแฉ แแด แแ แแ፣ แ แฝแจแญ แ แตแแ፣ แจแปแฅแขแซ แ แแแแญแ แณแแฅ แ แตแแ แแ แจแแแฝแ แฒแแธแ แจแฐแแ
แต แ แแซแญ แแดแ แแแแแ แขแแฅแแ แฐแ แ แณแแฉ แฐแแฃแญแแต แ แแแแ። แญแ แแกแ แจแแด แฐแแฃแญแแต แจแ แ แ። แ แแ
แแญแแซแต แ แแซแฉ แแด แแแช แฐแญแ แจแแ แแ แตแ แแแแต แแ แแ แ แแแฉ። แจแแตแซ แดแซ แ แตแฅแแต แแ แจแแแซแ แจแแแต แแแ፣ แ แฃแญ แแแจแ แฅแฉแ แแตแแ แ แแฐแฃแฃแญ แฅแ
แฑแ แ แแก። แฐแแฃแญ แแญ แจแแซแแแต แฐแแ แตแจ แ แฅแญแแ แปแตแแ แแฅแจแฐแแณแญ แฒแแ แแตแซแแ แจแแแธแแ แ แญแ แแแต แแ แฐแแจแ ። แ แญแ แแแต แ แแ แซแแณ፣ แฆแถแ แ แแแญ แแญ แซแ แแแฐแฅ แแ። แ แแแ แแแฆแต 2005 แ แแซแ แจแตแแซแญ แแแฅ แ แแต แแ แฅแซแ แ แแซแแ แขแตแฎแตแซแ แฒแฐแตแ แแ แฒแซแแแฝแธแ แจแแ แจ แฐแ แแ። แ แแ แฐแแฉ แแ แถแญ።
แตแจ แ แฅแญแ แ แแแซแต แแญแ 41 แ แแบ แแ แฒแ แฅแ
แ แต แจแแ แจแ แแด แปแตแแ แแฅแจแฐแแณแญ แ แฎแแณแญแแต แจแแแซแต แแแณ แ แญแ แแแต แจแแ แจแฃแต แแแณ แ แแ แฃแ แ
แแญ แจแแ แฉแต แแแฑ แ แ แแฃแ แแแ แแจแจแป 1968 แจแฝแซแฎ แแฃ แฅแ แจแแตแแแ แแฝแต แซแ แแตแจแ แต แตแจ แ แฅแญแ แ/แแญแ แแช แ แซแแต แแญแ แ แขแฒแฉ แแญ แฅแแต แฅแแฐแฐแแแจ፣ แแด แณแแฎแนแ แฅแซแตแฐแฃแ แจ แฆแญแแฑแ แ แแแซแต แแญ แฅแแณแ แ แตแฐแแแ แจแแ แฉแต แปแตแแ แ/แฐแแณแญแ แ แญแ แแแต แแแซแ แฅแจแ แจแณ แฒแแต แ แญแ แแแต แ แแฃแฅแฎ แแด (แแแช) แฐแญแแ แแซ แฅแ แแญ แตแจแปแแ แจแแฎ แแญแฆ แฃแแ። แแญ แฒแ แปแตแแ แ/แฐแแณแญแ แ แญแ แแแต แจแแ แแแ แฅแแฐแแฑแต แ แแ። แ แญแ แแ แญแแ แฐแแฃแ แ። แ แญแ แแแต แแดแ แจแแณแ แตแ แฐแแแแฝ แ แแแแ แแปแตแแ แฒแฐแ แ แ แจแ። แญแแ แจแแฐแแแ แแดแ แ แแฌแ แฐแธแญแแแต แฒแแฑ แจแแ แฉแตแ แณแแฎแฝ แแ แจแแแซแธแ แฅแ แ แขแฒแฉ แฅแญแต แ แแฐแแณแแ፤ แจแแฑแแ แจแแฐแแ แปแตแแ แแฅแจแฐแแณแญแ แ แญแ แแแต แแธแ แฅแซแ แฒแแแญ แฅแแฐแแ แจแ แ แแต แฐแแต แฐแฉแ แซแ
แ แแญแถ แจแแฝ แแแ แฅแแฐแฐแฐแแ แฐ แญแแแซแ። แ แฒ แแธแญ แแฝแต แแตแฅ แฐแแ แจ። แแฒแซแ แ แญแ แแแต แตแแฝ แแแแฅ แฐแแฅแ แฑแณแ แแฃ። แแด แจแฐแแแจแแ แแแ แ แแ แแ แแแฑ แฐแแถแณแ፣ แแตแญแญแแฑแ แญแตแฅแ แต።
4. แ แฝแฅแ แณแแ
แ แฝแฅแ แณแแ፣ แจแ แจแ แตแ แธแแต แแ። แ แ. แ. แฅ. แฉแแจแญแฒแฒ แ แแณแฅ แตแแ
แญแต แจแแแฐแ แแแต แฐแแช แแ แญ። แแแฅแต แฅแแฐแฐแแฐแจแฐแ แจแแซแต แ แแ แ แฃแ แแ። แแแขแต 1967 แจแฐแแ
แต แแจ แฐแแแแ። แจแแ แ แแแ แ แฐแแ
แตแ แแฎแแซแ แ แฐแแแแต แแต แแฐแแแญ แ แแแแญ แแฎแแซแ แธแจ-แแแญ แแ แแแแต፣ แธแจ-แขแตแฎแตแซ แแแฅแ แ แณแ፣ แแแฅแ แฅแญแต แ แญแฑ แแแญแต แจแแณแญแ แ แแแ แ แฒแต แแฎแแซแ แแญแแ
แญแ แ แ
แฅแแ แ แแแต แจแ แแฐแฐแ แ แจแ – แ แแ แ แแฐแฐ แแญ แ แ แแ แฐแตแแ። แ แแฐแแแจแ แแณแฅ แ แณแแฉ แฐแแณแ
แแ፣ แ แตแแจแฑแ แแญแแซแต แตแ แแแ። แ แแ
แแแญ แฒแแฅแ፣ แฑแณแ፣ แซแญแฑแ แแฅแซ แแถ แ แแ แจแ แต แแ
แต แแแต แแแแ แตแฅแแต แแ แ แ แตแธแณแญ แ แตแ แญแฐแ แฑแณแ แฃแแ
แ แต แแ แพแณแ แแแแแต แแฝแแแ แ แแแต แ แแธแต แจแฐแ 06-แแแ แแซแ แ แตแแฅแฐแ แ แฐแฉแต። แ แจแแ แ แญแ แญแ
แ แฅแแฐแฐแ แจแแ แจแ แต แฆแณ แ แถแ แฐแญแถ แจแฅแฐแญ แ แตแแฅแถ แฅแซแแ แฅแแฒแแฅแ แ แฐแจแ። แแแ 1968 แ แแซแฉ แแฐ แ แแตแต แตแแแจแฐ แแฐแฐแ แ แจแ፣ แ แแ แ แแฐแฐ፣ แแด (แแแช) แฐแญแ แ แฐแแ
แต แ แแซแญ แตแแฐแแฐแ፤ แ แ แแซแญ แแญ แจแแฉแต แ แจแแ แ แญแ፣ แแฐแญ แแญแ แฝแฎแ፣ แตแฅแแต แแ፣ แตแฉแ แแตแแ፣ แ แฃแญ แแแจ แฅแป แแ แฉ። แจแแญ แ แ แแตแฉแต แแญแ แ.แ. แ แแตแฑ แ แแซแญ แฐแฐแฅแตแ แ แจแแจแฐแแต แแฐ แ แแซแฉ แแก። แแแต แแแ፣ แ แฝแฅแ แณแแ፣ แ แแ แแ แแแฑแ แตแจ แ แฅแญแ แแฐ แฐแแ
แต แ แแซแญ แแก።
แ แฝแฅแ แณแแ แแตแแฃแ แฅแ แนแแต แฅแแ แ แแฐแ แ። แจแฐแแ
แต แแฎแแซแ แธแจ-แขแตแฎแตแซแ แธแจ-แแแฅ፣ แ แแณแแ แ แณแ แตแแแ แแแแต แ แแ แต፣ แฐแแ
แต แ แฃแฅแ แแจแ แตแแแ แตแแแฝแ แขแตแฎแตแซแ แแแ แ แแ แต። แตแแซแญ แจแ แแซ แ
แ แแแต แแต፣ แ แแซ แ แแต แแ แแแต แแแแฅ แจแแแฒแซ แ แแ แแ แ แแแต แฐแจแซแจแจ። แญแญแญแฉแ แฅแแ แแจแณ แตแฅแฆ แแฝแต แฒแจแซแจแฉ แตแฅแแต፣ แแแตแ แ แฃแญ แฐแแฐแฑ። แแซ แ แฒแจแแญ แจแแแแ 06-แแแ แแซแ แแแแแฝ፣ แแแแณ แ แแแฐแแตแ แญแแ แ/แแตแ
แแ แ แตแ แญแฐแ แแฌแแ แ แฝแฅแ แณแแแ แฅแ แแฐแแ แแฎแแ แ แแฅแ
แ แแฐแแธแ። แตแฅแแต แแ แธแจ-แฐแแ
แต แแธแ แจแแ แแจแแต แฝแแ แ แแแ
แถ แฐแฃแธแ። แฅแแ แฝแฅแ แแฎแแ แจแฐแฐแฃแธแแ แแจแแต แญแแ แ แแแต แแซ แแญ แแตแแต แฐแแแฎ แ แฅแญแต แฐแฐแฅแตแ แ แ แแแฐแ แจแแ
แแแ แฐแฐแแ แฑ።
แ แจแแ แ แญแ แจแ แฝแฅแ แณแแแ แจแแฎแแ แ แแฅแ
แ แแณแฐแญ แฐแแถ แจแแ แจแ แต แฐแแคแ แ แซแฃแข แแต แฐแแ แฐแแ แแญแแณแธแแ แแแณแ แซแฐแจแแ แฅแจแต แจแแซแตแแฐแแแ แแ። แแซ แฅแแฐแแฃ แฅแ แ แฝแฅแ แแฐแ แ แแกแแ፣ แฐแแตแฐแแ፣ แฅแแต แจแแฃแธแแ แฒแ แจแแแแณ แ แแแฐแแต แแญ แซแแแ แแแต፣ แตแฅแแตแ แแแต แ แฃแญ แแซ แฅแแฐแแก แณแญแแ แณแซแตแฉ แญแแฐแ แฅแแ แตแแแแ แแฐแแแธแ แ แแ። แจแตแฅแแ แแจแแฑแ แจแธแ แฅแ แฐแ แ። แ แจแแ แ แญแ แญแ
แแ แ แณแแ แแตแซ แฐแแถ แฅแแตแฅแแต แแ แแฐแแแแ แต แฅแแ แฐแฅแฆ፣ แแฝแต แ แแแต แฐแแแแธแ። แแแญ แแ แแแ แ แแฐแจแแ። แจแฐแแ
แต แแแแแ แญ แฅแแฐแแแ แแแ แญแแ แ แแตแฅแแต แแ፣ แแแฐ แแแ แแแฐ. แแญ แฅแญแแ แณแญแแฐแต แจแแจแ แจแแ แฅแซแ แฐแแตแถ แแ แญ። แ แแแ แฅแจแฐแแณ แแ። แแแต แแตแ แต แซแแ แตแ แจแแ
แฑ แจแฐแแ
แต แแแแแ แญ แ แจแแ แ แญแ แแ።
5. แถ/แญ แ แณแญแแต แแธแ
แถ/แญ แซแตแแญแ
แแแ แจแ แญแ แตแ แถ/แญ แ แณแญแแต แแแ แจแ
แญแแ แฃแแแซ แแ። แแฐแ แฒแ แจแแแฃแญ แแตแ แแญแแต แตแแซแญ (แแแแต) แ แฃแ แแ แ แจแ แฒแแแณแแต แจแแแแต แจแตแแ แตแแต แ แฐแแ แแ แ แแแต แ แฐแ 1967 แจแฐแแ
แต แฐแแแแ። แ แฐแแ
แตแ แฅแ แตแ
แฐแถแฝ แฅแแฐแแแญ แ แแฐแ แซแ แญแ แแ แญ። แแแญ แแ แตแ
แฐแฑแ แแแตแฐแซแจแแ แแแจแ แฅแ แณแแฎแฝ แญแแซแ แจแแแ แฅแแแฑแ แฅแแฐแซแ แแต แ แแต แแฎแแซแแ แจแแจแต แฅแตแ แแ แแ። แจแแแฐแฐแ แ แจแ፣ แ แแ แ แแฐแฐ፣ แแด แแแชแ แ แฝแฅแ แณแแ แแญ แฅแฉ แแแแแต แตแแแ แจ፣ แฅแแแ
แแ แจแฐแแ
แต แแฎแแซแแ แจแแแแ แแธแ። แ แฝแฅแ แณแแ แ แแตแฅแแตแ แแแต แฅแแฐแฐแแฐแแ แถ/แญ แ แณแญแแต แแธแ แ แ แฝแฅแ แแแณ แจแฐแแ
แต แ แแซแฉแ แจแ แ ። แแ แฅแแ แ แแฐแ แ።
แถ/แญ แ แณแญแแต แ แแฎแแซแ แแฅแแ แ แฐแแ፣ แแแญแแ แแแฅแ แจแแ แณแฐแ แแ แฅแ แ แแแ แจแฐแแซแฉ แ แแซแญ แแญ แฒแแแแญแ แต แฅแแฐแแ แญ แญแณแแแ። แจแแฐแญ แแญแ แฝแฎแ แฅแ แ แจแแ แ แญแ แแแฃแฃแต แฅแแฐแแ แจแแ แซแฑ แจแฐแแแจแ แแ።
แจแแแต แแแ፣ แตแฅแแต แแ፣ แ แฃแญ แแแจแ แจแแแน แ แแซแญ แแญ แแ แจแปแจแจ แแแแแต แฅแแฐแแ แจแ แณแแฉ แแ แซแแแ። แแแ แแญแถ แตแฅแแต แแ แ แจแฆแณแ แ แแฐแ แต “แจแขแตแฎแตแซ แฃแแฒแซ แซแฑ แแญ แ แแฅแ แถ/แญ แ แณแญแแต แแธแ แ แตแญแ
แณแฝแ แฐแแ
แต แฝแแญ แฅแจแแ แจแฅแ แแ” แ แแแต แ แจแฆแณแ แแแแฉแ แฅแ แซแด แ แตแณแแณแแ። แถ/แญ แ แณแญแแต แแธแ แ 1แแ แแฃแค แจแฐแแ
แต แจแ แแซแญ แแญแซ แ แจแแฐแ แจแตแแฝ แแฅแญ แฐแแญแฆ แจแ
แแแต แ/แฎแแดแ แ/แแณแฐแซแ แ แแฅ แแ። แจแแตแฅแแต แแ แจแตแ แแฅแแต แแแป แ แแฐแณแซแ። แ แแแฉแ แฐแฐแแแ แ แแ แญ።
แญแ
แ แจแซแฒแต 5 แแ 1971 แ แ แฒแแฅแญ แกแต แแจแณ แแญ แ แฃแญ แ แฐแฃแแ แฆแณ แจแฐแซแแฐแ 1แ แแฃแค፣ แจแฐแแ
แต แแญแต แตแฅแแต แแ แแแแแ แญ แจแแแ แต แแฃแค แแญแฑแ แจแฐแจแจแกแต แตแฅแแต แแแ แ
แแแต แแธแ። แจแแ
แแ แแแฎ แแฐแ แฅแ แจแแฃแ แแฝแตแต แกแตแ แฅแแ
แ แซแแแ แต แแ แแ แญ።
แฅแแตแฅแแต แแ แถ/แญ แ แณแญแแตแ แแแฅแแต แฅแ แฅแแต แ แแซแแต แจแฐแแธ แแ แ แแ። แแแฆแต 1971 แจแแแซแ แแญแแต แฅแแต แ แขแตแฎแตแซ แฐแซแแต፣ แจแแแซแ แฆแณ แฐแแคแ፣ แ แฅแญ แ แฒ แแแฃแต แแแ แแ แญ። แจแ
แแแต แฐแซแแตแ แญแแแ
แ แต แแ แญ። แแ แฐแญแถ แแแ แจแ
แแแต แฐแซแแต แแฐ แแแซแ แแ แ แ แแซ። แแแซแ แจแแแแญแ แต แ แแต แ แตแฐแแฅแซแฅ แ แฉแ แจแแแซแ แฆแณ แ แแแต แ 10 แช.แ. แญแแต แตแฅแแต แแ፣ แ แฃแญ แแแจแ แณแแซ แจแแต፣ แจแณแ แแ แแณแชแซ แฒแแแญ แฃแแแแฝแญ แแแ แถ/แญ แ แณแญแแต แแธแแ แจแ
แแแต แแแแแ แญ แตแฅแแต แแ แตแแฆแญแแฑ แแแแแแญ แฅแ แ แตแ แซแ። แฅแแฑแ แแแตแซแ แ แแแแแต แ แ แฉแต แแฐแจแต แฐแจแฐ። แแณแธแแ แแฐ แแแซแ แแ แ แแตแซแ
แ แแแญ แแต แฅแซแ แแแแฑแ แแ แ። แฅแแ แถ/แญ แ แฃแฒ แแตแแ แจแแตแฅแแต แแ แแต 500 แแตแญ แซแ
แ แ แแแแต แญแแต แแฐ แฆแญแแฑ แแ แ แฅแแแ แแ แญ። แถ/แญ แ แณแญแแต แแธแ แตแฅแแต แแ แฅแแณแฐแแ แฐแ แ แแฅแแต แฅแจแฐแแ แณแ แจ250-300 แแตแญ แญแแต แจแแฑ แแซแจแ แณแแซ แจแแต แ แซแแ แฒแแแญ แฃแแแแฝแญ แ แแแ แ แตแฐแซแญแแ แ แแฃแฅแฎ แ แแฐแฎแต แถ/แญ แ แณแญแแต แแธแ แจแแญแฃแ แ แจแญแซแฌ แแญ แแณแ። ‘Special Column’ แฐแแตแถ แฒแแตแ
แ แฉแต። แ แฃแญ แแแจ แ แแฅแแต แฉแฆ แแฐแ แฐแ แแถ แ แฃแฒ፣ แ แฃแฒ፣ แฅแ แ แแฅแซแต แ แฅแ
แแแญแต แ แฒแแ แแฐแ แ แแแแ። แถ/แญ แ แณแญแแต แตแแแฐ แ
แ แฉแต፣ แแแญ แแ แแแแ แฅแแณแตแแแฉ แฅแ แฐแแแถ แจแแตแฅแแต แแ แแญ แฐแแแแ። แ แแแ แถแตแฑแ แฐแซแญแแ แฒแแฑ แ แจแแธแ።
แถ/แญ แ แฃแฒ แแตแแ แฅแ แฅแ แแตแแต แตแแแแญ แฅแฑ แฅแแฐ แฃแแแซแแฑ แฌแณแแ แแแญแแญ แแแจ። แแญแฃแ แแญ แจแแณแฝแ แฅแญแต แฐแแแฑแ แจแแถ แ แแฃแต። แ แฒแแแญ แฅแญแต แณแแซ แจแแต แแฐแแ แฅแ แฅแแฃแแ แแแณแต แ แแฐแ። แฅแญแทแ แ แแญแแต แ แ
แแ แซแแต። แฅแแ แถ/แญ แ แณแญแแต แ แแญแ แตแแแญ แ แแซแ แแฅแจแ แฐแฐแแฅแฐแ แแฐ แฆแญแแฑ แฐแแแตแ። แถ/แญ แ แณแญแแต แแถ แญแแ แญ แฅแแ แณแชแฉ แ
แซแ แ
แ แญแแซแ። แฅแ แตแฅแแต แแ แแแต แแแ แแแฐ. แ แแนแแ แฐแ แแณแ แฅ แจแแแฉแต แแ แจแฅแแฑ แแ แญ። แฅแแแ
แแแแฝ แ แแต แขแแฉแแ แตแแปแธแแ แจแฐแแฐแฐ แฐแแแแธแ፣ แจแ
แแแต แแฎแแซแ แญแแฐแ แซแแต แตแแปแธแ แแ แ แณแแฉ แแแต แฐแฐแซแจ። แ แแ
แ แแญแแซแต แฅแ แฒแแญแซแฒแซแ แฅแซแแแฝแ แ แแแณแต แจแฐแแ
แต- แ
แแแต แ แแซแญแ แ แตแจแแแต። แ แแซแฉ แฐแแแแแ แ แ แ แ แแตแจแ แ แตแญแ
แณแฝแ แแแแฝแแฝ แฐแแณ แฅแ แฅแ แณแแฎแฝแ แฅแ แแนแแแ แแจแแจแแซ แแญแแซแต แ แฐแจแแ። แจแฒแแญแซแฒ แฅแซแแ แฐแแแซแแฝ፤ แแฐแฐแ แ แจแ፣ แ แแ แ แแฐแฐ፣ แแด แแแช፣ แ แฝแฅแ แณแแแ แถ/แญ แ แณแญแแต แแธแ แซแแฃแ แแต แแ። แจแ
แแแต แแฝแตแตแ แ แแฃแแแ แแชแแฝ แจแแฅแแซแธแ แแ แฅแจแแจแ แแ፣ แฐแซแญแแ แ แแแฅ แแญแ แแแญแต แญแแญแฃแ።
6. แแฐแญ แแญแ แฝแฎแ
แแฐแญ แแญแ แฝแฎแ แจแ แจแแ แ แญแ แแญ แ แแแ แจแแแฅแต-แฐแแ
แต-แ
แแแต แจแแฐแจแต แตแแแญ แซแตแแแก แ
แแแตแ แจแแ แฉแต แแแฑ แแธแ። แแ แจแแ። แแฐแญ แจแฐแแธแ แฅแแตแ แแ แแแแ แซแ แจแแ แฉแต แ แแซแญ แฅแฉแ แฐแ แซแ แแ แ แแแต แ แแแฝ แฐแแแฏแ። แ แ
แแแต แ แแซแญ แ แตแจแแจแแ แต แ แฐแแธแ แแแแแฝ แฐแ แซแ แแ። แแป แแ แฅแ แซแฑแ แซแแแแ แ แแแ แซแตแแฐแแแแ።
แแฐแญ แแญแ แฝแฎแ แจแฐแแ
แต-แแแแต แจแแฐแ แ แแซแญ แจแตแญแ
แฑ แ/แแแแแ แญ แ แแ แจแ แต แแ แ แแซแฉ แจแแแฝแแแ แแตแซแ แฝแฅแญ แ แแแ แจ1969 แแจแซแป แซแฑ แแ แ แแแ แจแตแแต แณแแญแ แฐแแแ แแ แแญแแต แซแณแ แแ። แแ แฅแปแแ แ แแแ แจแ
แแแตแ แ แแซแญ แญแแแฝแแต แแแแ แแซแแแธแ แ แแปแแ። แ แฐแแแแ แแแ แ แณแแฉ แแ แฐแ แจแณแแแแต፣ แ แแญแแตแ แญแฅแญ แจแฐแฐแ แ แแฐแญ แแญแ แญแฝแฎแ แแ። แแฐแญ แจแณแแฉ แฅแฅแ
แแฐแ แแ፣ แฐแแฐแฐ። แแแแแ แณแแญ แฝแแญ แฒแแฅแแ แแแฐแญ แซแแแซแ። แแฐแญแ แฝแแฉแ แญแแณแแณแ። แแฐแญ แซแฑแ แจแณแแฉแ แฅแ แจแแแกแ แแ
แญ แฃแฅแแ แตแแแแ แแแแแ แฐแตแฐแ แแ แญ።
แแแต แแแ แจแแแซแแ แแญแญแฒแตแต แแแแตแต แแ แตแแซแญ แแแแแ แจแแแแแฑ แฐแฐแ แ። แ 1แแ แแฃแค แ แฎแแฝแ แฐแจแ แฅแแฐแฐแแแ แ แ แแ แแฉแแณแธแ แฅแ แแแต แแแ፣ แแฐแญแ แฅแแฐแ แแต แแจแต፣ แแฐแญ แแญแ แฝแฎแแ แ แ แแ แตแแธแ แแแ แฅ แจแแแญแแ แต แแ แแ แญ። แจแแ แซแธแ แแฉแแตแ แจแแญแแณ แแ። แแแฑแ แ แฐแปแซแช แแแแต แแ แแ แต።
แ แฅแ แแแต แแแแ แ แ แฎแน แจแแซแแญแกแต፤
แฅแแซแ แฒแแญแซแฒแซแ แ แฅแฎแต แจแ แฅแฎแฑ แแฐแจแณแ แแญแแฝ แตแ แแ แฌ፤ แแฅ แ แฐแฉ แฒแแ፣ แฅแแแ
แ แซแฐแฃแฐแฅแ แจแ แฅแฎแฑ แตแแ แแแแ แฅแ แแกแ แญแแณแ። แแฅแณแ แแ แฌ แจแแแต แฅแแต แ แฌแแฝ แ แแญ แซแแต แแฅแณแ แแ แฌ แตแแแ แ แแญแญแต แแแแ แณแญแแต แแฅแณแ แแ แฌ แจแตแแแฝแ แ แแต แแ፣ แ แแแต แ แตแจแแ แ แฐแแแจแแ። แแฅแณแ แแ แฌ แแฐแแฐแต แแฅแแต แ แแ แต። แแแ แจแแญแญแต แแแแ แ แแต แแฅแณแ แแ แฌ แแ። แแแต แแแ แญแ
แแ แ แแญแ แแฝแแต แฅแซแฐแ แณแแฉแ แซแตแฐแแญแ แต แแ แญ።
แแฐแญ แแญแ แฝแฎแ
แแฅแณแ แแ แฌ แจแแญแญแฒแแ แแแแแ แ แแต แ แญแฐแแ። แ แแแ แ แ
แแแต แจแแแฐแจแฐแ แแญแญแฒแตแต แแญแฒ แแฅแณแ แแ แฌ แ แแต แณแญแแ แจแตแแ แ แแซแฝแ แฅแ แแณแแฝแ แแ แฐแฅแ แ แตแแ แฅแแฐ แแณแ
แแณแแ
แ แแ แต። แจแแแต แฅแแต แ แฌ แ แแญ แซแแ แแฅแณแ แแ แฌ แแ แตแแแแ แ แแต แแ แฅแซแแฝแ แแญแแซแต แ แแแ แญ แซแแณแ แแต แจแตแแซแญ แแฅแจแฐแฐแฅ แแนแ แธแจ-แแแฅ แแ። แแฅแจแฑ แแ แฅแจแฐแแจแฐ แแ
แแแต แแข แฒแฐแจแ แแฐแแฐแแ แแแฅแ แแแจแฐแ แคแต แฐแ แซแ แแธแ። แญแ
แจแแณแฅ แแฉแแต แ แแแแต แแแ แกแตแ แฅแ แ แแฐแญ แแญแ แฝแฎแ แแซแญแ แฐแแถ แ แแแฃแต แแแแณแต แแ แ።
แแแต แแแ
แ แฅแแ แ แแฐแญ แแญแ แฝแฎแ แแซแจแ แฐแ แแฉแแต แ แ። แ แฅแจแ แแณแแแ แ แแฝแแ። แแฐแญ แแญแ แฝแฎแ แแฅแณแ แแ แฌ แจแแญแญแต แแแแ แจแตแแ แ แแญ แแ፣ แ แแต แ แญแฐแแ แฅแ แซแแแ። แญแ
แจแแซแแแญแฐแ แแฐแญ แแญแ แฝแฎแ แธแจ-แแญแญแต-แแแแแ แ แซแฅ แแ แฒแ แ แซแแ แ แแ แจแแญแแแแแ แแฐแญ፣ แ แแฐแ แแฐแแฝแ
แแฝแ แ แซแฅแ แจแแฝ แแ
แตแแ แแ แแตแญแฉ แฐแแญ แแฃ። แแฐแญ แแญแ แฝแฎแ แ แแแ แ แแ
แแฃแค แ แแญแ แแแ። แแฅแณแ แแ แฌ แจแตแแแฝแ แ แแญแ แแณแ
แแแ แแ แฅแแแด แแ። แแฅแณแ แแ แฌ แ แแต แแ แฅแ แแตแแแฅ แธแจ-แแแฅ แแ። แฅแ แแแต แแแ แแฅแณแ แแ แฌ แ แแต แแ แแแณแธแ แแแแณแธแแ แ แตแญแญแ แญแแแธแแ።
2. แ แแแแต แแฃแค แ แแซแฉ แณแแ แแแแต แแฐแแ แ
แจแแแแต แแฃแค แ แแ
แ แ แแแแ แธแจ-แฒแแญแซแฒ แฒแซแแต แฐแแฅแถ แแแ 21 แแ 1977 แแญแซแ แฐแจแฐ። แญแ
แแญแซ แแแแฅแแตแ แจแฐแจแฐแแ แแแต แแ แแ แแแ แจแซแ แแ แญ።
- แจแฅแแฃแ แฝแฉแป แแ แแแแ แแ แญ፣
- แ แแ
แจแฅแแฃแ แฝแฉแป แแแฅแต-แฐแแ
แต-แ
แแแต แจแแฐแจแต แตแแแญ แ แตแแแ แ แ แธแจ-แฒแแญแซแฒแ แ แธแจ-แแแฅแแฑ แ แฅแจแ แฅแจแแฉแต แจแแกแต แ แแแ แ แแซแฎแฝ แแแฃแจแญ แ แตแญแ
แจแฐแ แแ แแจแจแแ แจแตแแซแญ แแแฅ แฅแซแแ แจแ แ แแฅแแ แ แแตแฅแแต แแ፣ แ แตแแต แแแฎแ แฅแญ แจแฐแแแแ แแแแต แตแแฃแแธแแ แแแฐแแฐแ แแ แญ።
แแญแซแ
แ แแ แตแแฝ แจแแซแญ แฅแแต 250 แแ แญ። แแญแซแ แ แแตแขแญ แแ แ แแจแแต แจแแตแแแแแ แแแจแฅแ แแ แญ። แแญแซแ แฐแซแแฐ። แตแแน แฐแแ แจ። แ แแญแแญ แฐแแแจ። 1แ. แแฐแญ แแญแ แฝแฎแ፣ แซแแแ แตแแฝ 247፤ 2แ. แ แจแแ แ แญแ፣ แซแแ แตแแฝ 245፤ 3แ. แแจแแ แ แญแ แซ፣ แซแแแ แตแแฝ፣ 236፤ 4แ. แตแจ แ แฅแญแ แแแฐ. แฅแซแ แจแตแแฝ แแ แซแ แแ แ። แแฐ แแจแจแปแ แตแแฝ แแ แซ แฐแจแฐ። แญแ
แแ แจแแแแธแ แ
แฅแฉ แแฅแจแชแณแ แแ แญ። แ แฅแแญ แฐแแณ แแญ แจแฐแแจแกแต แซแแแตแ แตแแฝ แฅแจแปแ แฒแแแฝ แจแแญแแ แจแแจแฅแ แแ แ แฃ። แจแแฃแคแ แฐแณแณแ แแฅแ แฅแ แ แแ แ แ። แแฅ แแฑ แแญ แฅแจแแจแฐ แแ แ። 24แ. แแแต แแแ፣ แซแแแ แตแแฝ 130፤ 25แ. แตแฅแแต แแ፣ แซแแแ แตแแฝ 127 แ แแแต แจ25แฑแ แจแแแแต แฐแแซแฎแฝ แจแแแแต แ/แฎแแด แฅแ แ แฅแแญ แฐแแณแ แแญ แ แแตแแแฅ แฐแแแถ แแฐ แฆแณแ แแถ แฐแแแ ። แแแต แแแ แซแฑแ แฐแ። แแฑ แจแฐแ แ แฐ แตแ แแฐแ። แตแฅแแต แแ แฐแแ แ แณแซแนแ แแ แแฃ። แจแฅแแต แฐแแแแฝ แ แแ แจแแฃแคแ แแแแแ แญ แจแแ แจแ แฅแฉแ แแตแแ แจแฐแแต แ แแ แ 11 แฐแแต แฅแแ
แฅแแแแ แฅแ แแฃแคแฐแแแ แ แฐแแ แฐ። แ แแ
แแญแแต แแ แญ แณแแฉ แฅแ แแแต แแแแ แแฌแต แแตแฅ แจแแ แซแธแ። แแแญ แแ แฐแแแฐแ แณแแฉแ แ แ แแต። แฅแ แแฃแญ แณแแญ แ แฅแ แแแต፣ แตแฅแแต แแแฐ. แฐแแฐแ፣ แจแแต แจแฐแจแแแ แธแธ።
แแญ แ 11 แฐแแต แแฃแคแ แฐแฐแจแ። แ แตแฅแแต แแ แ แแซแญ แจแฐแแจแกแต แ/แฎแแด แแแแต แ แฐแฃแตแฆ แนแแตแ แฅแแฃแ แฅแจแฐแ แฅแแฒแฐแฃแ แฉแต แ แฐแจแ። แจแ แจแแ แ แญแ แตแแฃแ แ แแแแ แฅแ แตแจ แ แฅแญแ แ แจแแฐแ แตแแฝ แจแแจแฅแแ แ แแแฃแญ แแฐแแตแแแต แญแ
แฐแต แจแ แตแฅแแต แแญ แฐแฐแแ። แ แแ แแฃแค แจแแแแชแซแ แฐแแแช แแแต แแแ፤ แแฅแ แตแฅแแต แแ፤ แแฅแ แตแจ แ แฅแญแ แ แแฐแฃแ แญ แแฐแญ แแญแ แฝแฎแ แฅแ แ แจแแ แ แญแ แจแ
แแแต แจแแแแต แฐแฃแจแแ แฐแฃแ። แณแแฉ แฐแฐแแแ ፣ แ แแจแแจแ แ แแแฐ። แจแ แแซแฉ แปแตแแ፣ แฅแฉแ แแฅแฉ፣ แแแฐ. แ แจแฐแซ แ แแแต แ แแแ แ แแซแญ แ แฐแแแช แจแแ แตแตแฅ แ แแจแฑแฃแธแ። แจแฐแฃแจแฉแตแ แญแ แแญ แฐแแแแ። แฅแ แแแต แแแ แฐแฐแแตแแ แ แ
แแแต-แแแแต แฎแญแป แแญ แฐแแแก። แจแ
แแแต แแแฐแ แแฐแแ แ
แญแ
แแ።
แจแตแจ แ แฅแญแ แญแ
แฐแต
แตแจ แ แฅแญแ แฐแแญแ แแ แ แฅแแฐแแ แจ แ แแแแ። แจแแฒแแฑแ แแ แ แแแ
แ แแ แญ። แ 1969 แจแแแแฝแแฝ แแ แฐแแแญ แแ แญ แฐแฅแ แ แตแฅแแต แแ แจแแแซแ แกแตแ แฅแตแจ 1977 แตแจแต แ แแญแ แแซแ แฒแจแณแฐแแต แฅแแฐแแ แญ แ แแแแ። แจแ
แแแต แณแแฎแฝ แฐแแ แแฐแจ แ แฅแญแ แฅแฅแ
แ แฅแ แตแแ แ แแฐแแจแแ แแ แญ። แจแแ
แ แจแฐแแณ แแ แ แแแแต แแฃแค แ แจแแฐแ แตแแฝ แจแแจแฅแแ። แแแญ แแ แจแแฒแแ แฅแแแฐ แขแฑ แตแจ แ แฅแญแ แจแฅแแฃแ แฅแแฑแ แแแญแซแต แจแ
แแแต-แแแแต แแ แแณแฐแซแ แ แแฅ แแแแ แแฐแญ แแญแ แฝแฎแแ แฅแ แ แจแแ แ แญแแ แ แแธแตแ แ แตแ แแฅแแต แฐแ แฐแฃแธแ። แฒแ แฅแแแ แฒแแจแฃแจแ แ แจแแจแแ แณแแญ แแแ แแแต แแแแ แฅแ แตแฅแแต แแแ แ แ แแตแฐแ แฐแแฝ แแจแฃแฝแ แฅแ แแฃแฉแ แณแแญ แฅแแฐ แฅแฃแฅ แฅแซแต แฅแซแฑแ แแ แแ แ። แ แจแฆแณแ แฅแจแแฐ แ แ แแ።
แ แ
แณแญ 1980 แจแ
แแแต แณแแญ แฃแแณแ แฐแแแ แคแญแตแซแ แแ แแ แฆแณ แแฐแ แ แแแแ። แตแแซแญแ แจแ แแซแ แ
แ แ แแแ แแ แ แแฅแฐแ แจแตแแซแญแ แแแแฅแต แแแตแจแต แแ แฅแแ แจแแ
แแญ แจแแแแแ แแแญ แจแแ። แคแญแตแซ แแฐแ แ แจแ แจแ แแธแแ แซแแแต แจแตแแซแญ แแฃแต แดแตแ แแแต แฅแตแจ แ แแ 130,000 แฐแญแทแ። แจแ แตแญแ
แต แ
แแแต แจแจแต แแจแณแ แแ แแก แจแแ แแญแแญ แตแแธแ แฅแแณแ แ แซแแแแ። แฅแแฐ แฐแ แณแญแแ แฅแแฐ แจแฅแต แฅแจแณแแตแ แแฐแ แแฐแ แแจแ። แ แแแ แตแแซแญแ แแ แฅแแแฃแแ แฅแแ แแ แฆแณ แ แแแตแ แ แ። แ แแ
แแ แฅแ แแแต แแแแ แตแฅแแต แแ แตแจ แ แฅแญแแ แ แแแแจแ แ 36,000 แณแแญ แแญ แแต แแจแฑแ แต። แญแ
แแ แณแแญ แจแแ แฝแณ แแ แแจ። แ แแ
แแตแซ แจแฐแฐแแฉแต แแแต แแแ፣ แตแฅแแต แแ፣ แ แฃแญ แแแจ፣ แแจแแ แ แญแ แซ፣ แณแแซ แจแแต፣ แปแตแแ แ/แฐแแณแญ፣ แ แ แ แฐแญแแแญแแแต፣ แตแจ แ แฅแญแ፣ แญแแ แแฅแจแแตแ
แ፣ แ แญแจแ แฅแแฃแญ፣ แแฅแฉ แ แตแซแต፣ แแจแแฝ แ แณแ፣ แ แแ แแ แแแฑ แแแฐ. แแ แฉ።
แจแฐแแฃแฉ แ แแปแธแ แ แตแจ แ แฅแญแแ แ แญแแ แ/แแตแ
แ แตแฅแแแ แ แแซแญ แแ แญ። แแณแฎแน፣ แฅแตแซแต แ แแจ፣ แแฐแ แฝแ፣ แแแฐแฅแแด፣ แแ แแแคแ แแแฐ (แแฒ แปแแ แ)፣ แฐแตแแฌ แกแฉแซ (แแญแณ)፣ แฐแตแแฌ แ แแญแฐแ (แ แฝแฅแ) แแแฐ. แแ แฉ። แจ200 แ แแญ แจแแแ แแซแ (06) แณแแฎแฝแ แ แแฐแแ แณแแฉแ แแฐแแต። แจแแแแ แฅแแตแ แ แฐแญแ แแ 21-23-27 แ แฅแ
แ แแญ แซแตแฐแ แตแกแต แฅแ แตแฅแแต แแ፣ แแแต แแแ แแแฐ. แจแแ
แฐแแตแฐแ แแ።
แตแจ แ แฅแญแ แญแ
แแ แญแ
แฐแตแ แ แจแแแซแ แฐแแฃแญ แจแแแธแ แตแแฝ แแฐแ แฅแ แจแแแแต፣ แตแฅแแตแ แ แฃแญ แแแจ แแญ แฐแแตแถ แจแแ แจแ แ แแแแฃแฃแต แฐแงแกแ แแ แ። แตแจ แ แฅแญแ แแแแ แซแฃ แฅแปแแ แแ แฅแจแฐแแแจ แแแต แแแจ። แณแแฉ แแ แ แแ፣ แซแแ። แจแแแต แขแฎ แ แฃแแต แ แจแแฉ แ แตแฅแแต แแ แจแฐแแแฐแแ แจแชแต แแแแฅ แฅแญ 1,000 แ แแแ แแ แ แ። แฐแแแฐ፣ แแฅแฉ แ แตแซแตแ แฅแแฐแแ แ แแแ แแ แฅแแแ። แตแจ แ แฅแญแ แ แแธแแ แญแ
แฐแต แฅแตแจ แแฌ แ แ
แแแต แณแแญ แฅแจแฐแแแ แแ።
3. แจแ
แแแต แแถแตแฐแ แแ แแฐแแ แ
แแ
แฑ แฅแ
แแต 1980 แแ แญ። แจแ
แแแต แ/แฎแแดแ แจแแฎ แจแแแแต แ/แฎแแด แ แ แแตแแต แจแฐแ แซ แตแฅแฐแฃ แแ แญ። แ แแ
แแ แจแฐแแฑแต แฅแซแแแฝ แจแตแแฃแ แฝแฉแป แณแญแแ แจแ
แแแต-แแแแต แแแต แขแฎ แฑแฎ แจแแ แจแแ แจแฐแแธแแต แตแ
แฐแถแฝ แซแแฐแแจ፣ แฅแ แตแ
แฐแต แฅแจแแธแ แแ። แจแแ
แตแ
แฐแฑ แแแญ แ แแ แต แแแฐ. แ แแแต แจแแจแ แ แฅแซแ แ แแณแซแช แแ แ แแแแก፣ แตแฅแแต แแ แ แแแซแ แตแฅแฐแฃ แจแแจแกแตแ แฅแซแแแฝ แ แแ แแตแ
แ แฐแจแแธแ። แแแต แแแแ แจแตแฅแแต แแแ แแณแฅ แฐแแ። แฅแซแแแนแ แซแแฑแต แ 1975 แ 2แแ แแฃแค แจแฐแแจแกแต แจแ
แแแต แ แแซแญ แแธแ። แฅแแฑแ፤
- แญแฅแฎแ แ/แแญแซแ แจแ
แแแต แ/แฎแแดแ แจแฐแซแแฑ แจแแแตแฒแญ แแ แแแ แจแแ แจ፣
- แ/แฅแแด แแตแแ፣ แจแ
แแแต แ/แฎแแด፣ แ แ
แแ แจแ
แแแต แญแแ แฆแฎแฝ แจแฎแแณแฎแฝ แจแ แแญ แแแแ แฐแแฃแฃแช แจแแ แจ፣
- แฐแ แจ แแฅแจแปแตแ
፣ แจแ
แแแต แ/แฎแแดแ แ แ
แแ แจแ
แแแต แ/แฎแแดแ แแแต แขแฎ แฝ/แคแต แแแ แจแแ แจ፣
- แฐแญแ แแแ፣ แจแ
แแแต แ/แฎแแดแ แจแแตแ แจแตแญแ
แฑ แแ แจแฐแ
แแแต แแแ แจแแ แจ แแธแ።
แจแแญ แจแฐแ แแฑแต แ แซแฑ แ แแซแญ แฃแแจแกแต แแณแฅ แ แแแแฉ แจแฅแ แแฐแญ แแญแ แฝแฎแ แฅแ แ แจแแ แ แญแ แฐแแแแฝ แฐแฅแแ แฐแแแแ። แแแแฎแน፣ แแแต แแแ፣ แตแฅแแต แแ፣ แตแจ แ แฅแญแ፣ แ แแ แแ แแแฑ፣ แ แฃแญ แแแจ፣ แฅแฉแ แแตแแ፣ แแฅแฉ แ แตแซแต፣ แ แญแจแ แฅแแฃแญ แแธแ፡ แฅแแแ
แจแแแต แขแฎ แ แฃแแต แฐแฐแฅแฐแ แ แฐแแแแฎแนแ แ แแตแ แซแต แฅแญแแต แฅแแฒแซแฐแญแ แแฐแ። แ แแจแกแ แต แแแ፣ แซแแจแฃแฝแแต แแณแฅ แธแจ-แ
แแแต-แแแแต แ แแแ፤ แจแ แแซแญแ แจแแแแแณแฝแ แฐแแแณแฝแ แ แฐแซ แณแแญแแต แแฅแ แฐแฅแแ แ แตแฅแแต แแแ แแแต แแแ แฐแฐแแ แฑ። แญแ
แแ
แต แ
แแแต แแถแตแฐแ แแ แจแฐแฐแแ แแ แต แแ
แต แแ แญ።
5. แจแ
แแแต แแ แซแฐแ แแ แแฐแแ แ
แญแ
แจแ
แแแต แแ แซแฐแ แแ แแฐแแ แ
แ 1993 แจแฐแแ แจแ แแ። แแแ แแแ แจแตแแฃแ แฝแฉแป แแ แญ። แแแ แ แแฑ แแขแตแฎแตแซ แฐแแญแแช แแ แแแ แฐแแ แธแจ-แขแตแฎแตแซ แแ แจแฐแแ แจ แแ แณแฐแ แ แญแฐแแ። แ แฅแ แตแจ แ แฅแญแ แจแแแซแ แกแตแแ แธแจ-แขแตแฎแตแซแ แธแจ-แแแฅ แแ። แแแซแฝแ แขแตแฎแตแซแ แซแแจแฑ፣ แจแแญ แฃแ
แญ แจแฃแ
แญ แ แฏแ แจแธแกแ แซแตแแ แ፣ แจแแญ แแฅแแต แฅแแแต แจแแธแ፣ แแแฅแ แแตแ
แแต፣ แแฝแแญ፣ แแ แฝแณแ แแตแฐแต แจแณแจแ แฅแ แแแต แแแ፣ แตแฅแแต แแ፣ แตแจ แ แฅแญแ፣ แฐแแแฐ แ/แแญแซแ፣ แแฅแฉ แ แตแซแต แแแฐ. แฐแฃแฅแจแ แ แแแฅแ แ แแแญ แจแฃแต แแแแ แจแแธแ แแธแ። แ แแแต แจแฐแฐแแ แแ แต แแแฐแ แแญแแซแต แฐแแ แจแตแแฃแ แฝแฉแป แแ። แแ แแแ แแแญ แ แแแ แจแ።
6. แจแ
แแแต แแ แแตแฐแ แแ แแฐแแ แ
แ
แแแต แขแตแฎแตแซแ แแฎ แ แ
แ แแแต แจแฐแแฃแ แจ แ แแ แแชแ แแแต แแแแ แจแ
แแแต แ แแซแญ แแแ แ แแแซแฝแ แจแแฐแแแ แจแฅแแฃแ แแแ แญ แแญ แฐแฐแแตแแ แ แแแแฅ แขแตแฎแตแซแ แ21 แแแณแต แ แแแ แต แแ แ แแแฅแ แ แแแญ แจแแฐแ แแแแ แ แแแธแ แจแขแตแฎแตแซแ แแฅแต แแญแแแ። แแแฅแ แซแฐแธแจแแ แตแญแแต แจแแฐแจแฐแ แแแต แแแ แฐแ 7 แแ 2004 แจแแ
แแแ แ แแต แฐแแ แ። แฅแตแซแต แ แฅแณแชแ แจแขแตแฎแตแซ แแแฅ แแจแณแ แแแชแซ แฅแแฒแแ แแญแ แฅแ แแฎ แขแณแต แ แฅแแฑ แจแแแต แแแแ แแต แแแจแ። แแแณแแน แแแ แแ แญแซแณ แขแตแฎแตแซแแซแ แจแฅแแญแณ แแ แแ። แ แจแแแ แแช แแแต แแแ แจแแ
แแแ แ แแต แฐแแฅแ แแแชแซแแ แฒแฆแ แ แฐแจแ። แ แแ
แ แแญแซแต แ
แแแต แแ แแตแฐแ แแ แฐแฐแแ แ። แจแแญ แฅแตแจ แณแฝ แ แ
แซแแ แ แฅแแฃแ แฝแฉแป แฅแแฐ แฑแฃ แฐแแจแจแจแจ።
1. แจแฐแ
แแต แแ แ แฅแฃแ
แฐแจแซแข (Old guard) | 2. แฐแแณแฝ
(Catalyst) | 3. แจแแแต แแแ แแญแต
(Legacy) |
| แตแฅแแต แแ | แฐแฅแจแฝแฎแ แ/แแซแคแ | แ แฃแญ แแแฑ |
| แฅแญแแ แ/แญแญแตแถแต | แแณแธแ แ แฐแ | แณแแซ แจแแต |
| แ แญแจแ แฅแแฃแญ | แดแแตแฎแต แ แตแแแ | แ แจแ แแญแฉ |
| แธแแญ แ แญแ | แ แแ แ/แแ
แต | แดแแตแฎแต แแแต |
| แ แฃแฒ แแ | แญแแฐแซ แ/แแญแแต |
แฅแญแแ แแจแต፤
แตแญแ แช/แแญแซแ
|
แฅแ แตแฅแแต แแ แซแแธแ แฐแแ แฅแแต แฒแแ፤ แฅแ แ แฃแญ แแแฑ แจแ
แแแต แ/แฎแแดแแ แ แฅแแต แญแแแ። แฅแ แฐแฅแจแฝแฎแแ แจแแ แฃแญ แแแฑ แตแแ แ แแธแ። แ แแต แฐแจแต แ แ፣ ‘แจแแแแฎ แแแ แแ แญแแซแญแก’ แฅแแฐแแฃแแ แแ። แจแ
แแแต แแแ แจแ แแซแฉ แแแฎ แฅแตแจ แฐแซ แ แฃแแฑ แ แแแแแ แ แฐแ แแ
แฐแ แจแณแ แ แแ። แ แแ
แแญแแต แ แณแแซ แจแแต แจแแแซแ แฐแซแแต፣ แแแต፣ แฐแ
แแแฑ፣ แจแแฐแซแ แแ แแแแแแฝแ แธแจ-แแแฅ แแธแ። แแแต แแแ แ แแญแแต แ แแ แจแ แต แแ แ 1993 แจแฐแแณแ แจแตแแฃแ แฝแฉแป แ แแแต แฒแฐแแฅแแ፤ แ แแแ แฐแแณแณแญ แแญแแต แฅแฃ แจแฐแจแฐแ แจแแแต แแแ แแต แ แแ แแ፤፡ แ
แแแตแ แ แถแตแต แจแจแแแ แแแ แจแฅแตแแฃแ แฝแฉแป แฅแป แณแญแแ แขแแญแตแ แแ แญแแซ፣ แแแต แญแแฃแ แญ แจแแแ แแ แญ። แ ’แ’ แตแญ แจแฐแแจแแฉแต แจแขแแญแต แแแ แจแแญแแซ แแณแชแซ แตแแแ แ แ แญแแซ แฃแฎแฝ แแธแ። แ ’แ’ แแฐแฅ แตแญ แซแแต แฅแ แตแฅแแต แแ แจแแญ แฅแฐแญ แณแฝ แขแแญแตแ แแแฃแ แญแ แแแซแต แซแแฅแ แฅแ แแ แฅแแ แแแแ። แ แฐแจแแชแ፣ แจแฅแแฃแแ แจแแแตแตแญแแต แฆแณ แแแ แญแแฃแแ แฃแฎแฝ แแธแ። แ แฐแแญ แ แแฅ แแตแแ แ แแแแฅ แแแแต แจแตแฅแแต แแ แจแแฐแฐแฝแ แจแขแแญแต แแชแแต แแ
แญแแแตแแ แฒแ แ ’แ’ แฅแ แ ’แ’ แจแฐแฐแแแต แ แแฐแแ แแตแ። แ แแฅ แแตแแแ แจแขแแญแต แ แตแแแฐแ แ แแ แฐแ แฅแแฐแซแณแแ แ แแแต แฐแตแแแฐแ แฅแญแแ แชแณแแแญแซแแ แ แฆแณแ แ แณแญแฌแญแฐแญแแต แ แตแแแกแต። แฅแ แตแฅแแต แแ แแ แญแ
แแ แ แแฐแแ แแตแ። แจแขแแญแต แจแ แแญ แแแ แถ/แญ แดแแตแฎแต แ แตแแแ แแ። แฅแ แตแฅแแต แแ แ แแ
แแซ แฐแแฅแฐแแ።
แ ’แ’ แแฐแฅ แซแแตแ แฅแ แฐแฅแจแฝแฎแ แ/แแซแคแ แตแแ แฅแจแณแธแ แ แ แฃแญ แแแฑ แจแแแซแ แ ’แ’ แแตแฅ แตแญ แซแแต แ ’แ’ แฅแ แ ’แ’ แแตแฅ แซแแต แฅแแณแญแตแแแ แ แแซแจแแธแ แแแ แแแญ แ แแฐแแฎแต แ
แซแ แแตแฅ แฅแแฒแแก แซแฐแญแแ። แ แแฅ แแตแแแ แซแแณแ แแแต፤ แ แแ แณ แฃแแญแ แแแฐ. แฐแแฃแ แฉ แฐแฅแ แแแตแฅแแต แแ แจแฐแฐแ แแธ แ แจแจแต แแ። แจแคแญแตแซแ แฐแแแ
แฐแฅแจแฝแฎแ แ/แแซแคแ ‘แขแตแฎ แดแแฎแแ’ แจแแ แแฅแฑ แ แแตแจแ แจแแแญแ แจแแแฅ แแฅแต แฅแจแ แแ แ แแแแกแ แ แปแญแ แฃแแญ แ แแตแแแฅ แขแตแฎแตแซแ แฅแซแฐแ แญแแแ። แ 2007 แ/แ แ
แแญ แแแตแตแญ แแแแ แแแแตแ แ แแ።
แคแญแตแซแแ แดแแตแฎแต แ แตแแแ፣ แจแแแญ แแฅแต แฅแจแแจแ แ แแแขแซแ แ แฐแแซแฉ แแแซแต แฃแแฎแฝ แแฅแฑแ แฅแซแฐแแ แจแแแ แจแ
แแแต แแช แแ። แขแแญแตแแ แแแต แแแ แจแแฐ แ แแ แ แแแแแต แจแฐแจแจแ แฐแ แแ። แ 2007 แแญแซแ แ แฅแ แแแฑ แตแแ แจแ แ
แแญ แแแตแตแญแแฑแ แฆแณ แซแแ แฐแ แแ። แฅแ แ แฃแญ แแแฑ แ แตแแซแญ แแตแฅ แจแแแแต แจแขแแญแต แแฅแชแซแแฝ፣ แฅแแฐ แ แแแณ แจแญแ แจแญแ
፣ แแถแฅ แฒแแแถ แแฅแชแซ፣ แแตแแ แขแแแแชแแ แแแฐ. แแแซแแ แตแญแป แซแแแ። แ แแ แแฐแจแต แขแแญแต แจแฐแแฐแจแฐ แจ1985 แแแฎ แแแแแฅแต แแฅแญ แ แญแจแแแ። แจแฅแแซแ แฃแแญแ แจแแแต แฃแแญ แจแแ แฐแจแแ แแแแฅ แ แญแแแตแ፣ แฅแแฒแซแตแจแแแ แจแแซแตแแตแฐแ แแแ แจแแ። แจแฐแแซแฉ แฅแแแฝ แฒแซแตแแฃแ แฒแซแตแแฃ แแจแฅ แแแแแฅแต แ แญแจแแแ። แแญแแซแฑแ แขแตแฎแตแซแ แ แ
แ แ แแแ แตแญ แจแซแแ แจแ
แแแต แฃแแฅแแฃแแต แจแแ แแฅแจแณแฝแ แตแแแ แ แแแ แแ แจแแญแแ แขแแญแต แแ።
แแแต แแแ แจแแฐ แ แแ แ แ
แแแต แแตแฅ แจแแฐแ แแแแฅ แฐแแฅแฏแ፣ แ แแแ แฅแแฐแแ แ แแ። แแญแแธแแ แจแฐแ แณแ แฅแญแต แ แญแณแธแ แ แแแฐแแแ แแแทแ። แแแ แจแ
แแแต แ แแซแญแ แ แฃแแน แฐแแแแน แ แแตแ แจแฐแจแแแ แ แแญ แแฅแแต แแแแ แ แแฐแแซแต แจ8.9 แแแฎแ แ แแญ แแแฅ แจแแฐแ แแธแ። แจ30 แแแฎแ แ แแญแ แขแตแฎแตแซแ แจแฐแแแฐแ แต แจแแแณแต แแแฉ แ แญแถ แจแแ แแฃแต፣ แแแนแ แ แตแฐแแฎ፣ แ แณแตแ แแแ แแแญ แซแ แแ แต แแฌแฑ แ แแแแแ แแแน แแตแฐแต แแแน แแแต፣ แแแน แแฝแแญ፣ แแจแแฅ፣ แแแชแซ แ แแฃ แ แตแญแแแณแ። แจแแ
แ แแแณแต แ
แแแถแฝ แ แฝแ แ แแ แจแแตแแแ แต แ แแแณ แ แแธแ። ። แจแ
แแแต แจแฐแฃแฃแฉ แ แแซแญ แจแแ แฉแตแ แ แแ
แ แธแ แ แแ แญแตแแแ።
- แ แแ แ แขแตแฎแตแซ แซแแ แแแแแแฅแต แจแ
แแแต แแแแแแฅแต แแ። แญแ
แ แจ1967 แฅแจแณแแแ แญแแแ แจแแฃแ แจแแญแแณแฝแ แฅแ แจแแฅแจแณแฝแ แแตแ แแ። แญแ
แแแแแแฅแต แจแฐแแฐ แ แแ แซแแแ แจแฐแฃแจแฉแต แ แแซแญแ แฐแแ
แแ แณแฐแญแ፣ แแฅแณแฝแ แฐแแจแถ แฅแแ แฅแแแฐแแแ። แตแแแแ แซแแแ แแแแแแฅแต แแญแแจแ แจแแต แญแแแ። แแแ แ แแ
แญแตแแแ፣
- แขแแญแต แจแ
แแแต แแฅแต แแ። แขแแญแตแ แ แขแตแฎแตแซ แซแแตแ แแข แฐแแแต แ แฐแแแแชแ แ แแฅแณ แจแแแฃแ แญ แแ። แแแณแ፣ แขแตแฎแตแซ แ แจแญ แแแแต፣ แฅแแซแ แฃแแญ፣ แแแต แฃแแญ፣ แแ แตแแต፣ แตแซแแตแแญแต แแแฐ. แจแแแชแฑ แแแตแ แจแตแแน แฅแตแจ แตแแ แจแแแฃแ แญ แแ። แญแ
แจแฐแ แตแซแฝแ แจแแฐแ แ แแแฅ แแฅแฅแญ แจแแ แ
แแแตแ แแชแแน แฅแป แณแญแแ แจแ
แแแต แแแแฅแณแ แฐแแแต แญแแญ แญแแตแแ። แตแแแแ แฃแแ แ แ
แแฝแ แขแแญแตแ แแจแแจแ แ แ แแ แแณแฐแ แ แแฅแ። แ แแ
แ แ แแซแแแแ แแแแต แญแตแแแ፣
- แจแแแฅ แจแ แแฝ แฐแแแ แแญแ แ แฅแฎแต แจแฐแแณ แฃแแ แแจแแจแซ แฐแซแแต แฐแ
แแแต፣ แแแต፣ แแแป፣ แแแแแฐแ แ แแฝแแ። แแแก แจแ แธแแ แจแ
แแแต แ แแซแญ แ แฃแแฝแ แฐแแแแปแฝแแ แ แฅแณแต แฅแแฐแแแ
แแ แฅแแแแแ። แแแ
แแตแแแฑ แจแขแตแฎแตแซแ แแแฅ แ แจแแณ แจแแแแ แ แแ แฃแแ แ แญแแต แฐแแฅแ แ แแฅแแต፣ แฐแแแ แตแญแ
แถแฝแ แแณแจแ፣ แแแฐแ แแแจแฅ แ แแฅแ። แจแ แแแแฝแ แแแแต แแแกแ แแตแจแแ
፣ แจแแฅ፣ แ แฝแณ፣ แ แตแฐแต แฅแแฒแแ แแตแจแ แฅแแแ
แ แ แแแแต แฅแแฐ แแณแชแซ แแ แแ แ แแฅแ። แแฃแฑแ แแ แฐแแ แ แฝแญแแฅแ፣ แแบแฝ แแแฐ. แ แฅแแต แ แตแแแถ แจแฅแ
แ แแญ แแตแจแ። แ แแณ แจแแแแแ แขแตแฎแตแซแแแต แจแแ แตแญ แจแฐแฐแฐแแ แฅแแแต แแฅแแต፣ แจแ แแญแ แแแแ แแฅแแต፣ แ แจแตแแแ แแณ แจแแแแแ แตแญ แแฐแจแฑแ แแ
แแ แฅแแณแแแ แจ แแตแจแ። แ แแ
แ แแแ แญแตแแแ።
แขแตแฎแตแซแ แ แแ แแ แฅแจแแซแต แแ?
แแแต แแแ แจแแฐ แ แแ แ/แแญแซแ แฐแณแแ แจแขแตแฎแตแซ แ /แแแตแดแญ แฐแฅแ แฅแแฐแฐแฐแจแ แแแ แขแตแฎแตแซแ แซแแแแ። แแแญ แแ แ/แแญแซแ แจแฅแแแต แณแญแแ แจแแธแต แ /แแแตแดแญ แแ። แขแตแฎแตแซแ แ
แแง แแญ แ แแแ แแแ
แฉแ แจแแจแแ แ
แแแต แแ። แจแแแจแ แแญแฃ แแแ แขแตแฎแตแซแ แจแแแฉแตแ แจแแซแตแฐแณแตแฉแต แฐแฅแจแฝแฎแ แ/แแซแคแ፣ แดแแตแฎแต แ แตแแแแ แแแญ แแฅแจแ แฅ แแธแ። แตแแแ
แขแตแฎแตแซแ แแ แฅแจแแซแต แแ แแแแ แฅแซแ แ แตแญแญแ แจแแญ แจแฐแ แแฑแต แถแตแฑ แจแ
แแแต แ แแซแญ แแธแ። แจแตแญแแฑแ แแแ
แญแ แ แแแ
แแแฐแฆแฝ แญแแซแ። แ/แแญแซแ แฐแณแแ แ แตแญแ แซแแตแ แจแแซแฐแญแ แแแปแ แแ แ แแฃแญ แแ።
แ 1922 แจแฐแแแฐแ แจ83 แแแฑ แแซแแ แแณแฉ แฝแแแ แตแฅแแต แแ แจแแแซแ แกแตแ แแฃแแฅแแฃแแฑ แฅแแ
แแต แ แญแแแฃแธแแ። แแชแแน แจแแแแแต แแญแแซ แฅแป แแ። แฅแ แ แฃแญ แแแฑ แจแ แฐแฅแจแฝแฎแ แแญ แฐแตแแแฐแ แ แตแแซแญ แชแแฅแแญ แแแแฅแต แแตแฅ แฅแแฝแแ แ แณแตแแก። แแแแฅ แฅแแแแแแ፣ แจแแฐแ แฃแแต แแตแกแแ፣ แฅแแ แจแฅแแแฐ แฐแแแแฝ แแ แ แแแต แฐแตแแแฐแแ።
แแแแฅแแ แจ2007 แแญแซ แ
แแแต แ แ แธแแแแต แแฅแถ แแ /แแแตแดแญ፣ แ/แ แ
แแญ แแแตแดแญ แจแแแแตแ แฅแฉแแนแ แ แแแ
แทแ። แ แ
แแญ แแแตแดแญ แญแแแ แฐแฅแ แจแณแจแ แดแแตแฎแต แ แตแแแ แฒแแ፣ แ/แ แ
แแญ แแแตแดแญ แแแ แจแณแฐแ แ แฐแฅแจแฝแฎแ แ/แแซแคแ แแ። “แ แฃแญ แแฐแญแซ แจแแ แแแต แญแ แญแแซแ” แแแต แญแ
แแ። แ
แแแต แจแฐแณแจแ፣ แจแ แฐแ แฐ แแแต แแ። แ แแ
แฐแจแ แแญ แซแ แแฝแตแณแ แตแญแ
แต แขแตแฎแตแซแ แจแแฆ แจแแแแต แ แ
แ แจแแแ። แ แขแตแฎแตแซ แแแฅ แแญแ แญแแตแ แ แแตแแต แญแฐแแฐแณแ። แญแ
แแ แตแญแแณแธแแ แ แแ แแ แแแญ แคแตแ แ แแญ แแแญ แจแแแแแแ แจแแฎ แ แแตแแณแฝแแ แ แ แแญแจแ แ แแแฃแ แ แแฝ แแซแ แ
แแแตแ แจแแฐแแฐแต แแแ แ แแ แแ።
แจแแแต แแแ แซแฅแญ
แ แแ แฅแแต แฅแซแแแฝแ แ แแแต แฅแฐแแตแแแ። แแแต แแแ แแขแตแฎแตแซ แแ แแ?
แแแต แแแ แแขแตแฎแตแซ แจแ แแต แ แแต แฐแแ แ แแต แแ። แจแ แฃแฑ፣ แจแฅแแฑแ แจแ แซแถแน แจแแจแฐแ แ แขแตแฎแตแซแ แ แแแง แแญ แจแแธแแ แแ፤ แจแแแญ แแแจแต แตแญแแต แ แณแชแญ แจแแญแจแณ แแ። แฅแฑ แฅแป แณแญแแ แจแ
แแแต แ แแซแญแแ แญแจแแซแ። แจแตแ แแญแแซแธแแ แ แฐแแซแฉแต แฝแแแผแ แจแแ
แ แแญแ แตแแซแฐแตแณแธแ แฅแแฑแ แแแแจแตแ แแแณแจแญ แญแปแแ።
แจแแแต แแแ แซแฅแญ แ แขแตแฎแตแซ แแแต፣ แฅแตแแต፣ แฒแแญแซแฒ แแแตแต แแ แแแต แแ? แ แฅแญแฑ แ แแซแญ แ21 แแแณแต แขแตแฎแตแซ แ แแแตแ แ แฒแแญแซแฒ แ แฅแฃแแฝ แจแแแต แจแ
แแแต แฐแแแแฝแ แ แแญ แตแญแ
แต แฐแฅแแ แจแแ แฉแต แธแจ-แแแฅแ แธแจ-แขแตแฎแตแซ แตแฅแตแฅ แฅแป แแธแ። แฅแ แแแณแธแ แซแฐแฉแ แ แแฃแธแ። แแแฉ แจแฐแแแขแฆแฝ แแ። แแแต แแแ แจแแแซแ แ
แแแตแ แ แแซแฉ แ แฐแแฅแฎแ แธแจ-แแแฅแ แธแจ-แฒแแญแซแฒ แแ። แ
แแแต แ แแฃแ แฉ แ แแฃแแแ แฅแ แแฝแตแต፣ แฅแแฒแแ แธแจ-แฒแแญแซแฒ แแ แซแฐแ แจแแ
แฝแ แต แจแแแต፣ แฅแตแแตแ แฒแแญแซแฒ แ แซแแ
แแแ แ แญแฝแแ። แแฃแฃแ แ แแ แแ แซแฐแ แฃแ
แญ แแ แฐแแแถ แแคแแญแตแชแญ แแฐแถ แแญแ แแคแต แแตแชแซ แแแญ แแณแฐแญแแ แ แตแฝแแ። แ แแณแญ แแซแญแฆ แแแถ แจแแตแจแ แแช። แ
แแแตแ แ แแ
แ แญแแต แแแแแจแฐแ แญแแฃแ። แตแแแแ แจแแแต แแแ แซแฅแญ แธแจ-แแแฅ፣ แธแจ-แแแต፣ แธแจ-แฅแตแแต፣ แธแจ-แฒแแญแซแฒ แแ። แแแตแ แแฅแจแ แ แฎแน แ แแญ แแฅแแต แแแแ แจแฐแฐแแฉ፣ แ แแตแ แจแแแฅแ แจแแแญ แแฅแต แจแแจแ፣ แจแขแตแฎแตแซแ แแแฅ แ แแฝแตแต แแแ
แซแธแ แซแฐแแฉแ แจแแฐแ แแธแ። แฅแแฐแแ
แซแ แจแแแ แแฝแตแต แแแแตแต แแแณแ แแแ แ แญแฝแแ።
แแแต แแแแ แ
แแแต แแขแตแฎแตแซแ แแแง แแ แแธแ? แ แแแต แแแแ แ แตแฅแแต แแ แจแแแซแ แแฝแตแต แแญแฒ፣ แขแตแฎแตแซแ แจแแแฆแต แแญ 1983 แแแฎ แจแฐแแฃแ แฉ แแฒแ
แขแตแฎแตแซแ แแแง แ แแซแ แแแแต แ
แ แ แแแ แจแแฐแแฝแ แต แแ
แต แแ፣ แฅแแ แ
แ แแขแ แ
แแแต แ แแแซแฝแ แ แจแแแซแ แตแญแแต แฅแจแแธแ แญแแแ። แ แแแต แแแ แจแ แแแ แแแ แจแขแตแฎแตแซ แแ แแแแต แแญแทแ። แฅแแณแแ แณแชแซแ แจแแญ แฃแแญ แแฐแฆแฟแ แ แฅแณแแฝ። แแแฅ แ แแฉ แฅแจแณแจ แจแแญ แแฅแแต แแแแ แฐแแฝแแ። แตแแแ
แแแต แแแแ แ
แแแต แฅแแฒแแ แ แแซแฉ แจแขแตแฎแตแซ แฐแแ แ แแต แแธแ።
แแแต แแแ แจแแณแฐแซแ แณแญแแตแ แตแตแซแฐแ แฃแ แซแฅแญ แญแฃแแ። แญแ
แ แแแแญ แฐแจแ
แแธแต แแ። แแแต แแแแ แจแแซแแแ แ แฅแจแแต แ แตแแ แจแแ แฉ แณแแฎแฝ แจแแญแแ แแต แแณแญ แแ። แจแ
แแแต แแแ แ แแ แแญแแต แจแแธแต แ แแ
แต แแตแฅ แฅแแฐแฐแแ แ แแแฝ แจแแซแณแญ แแ። แแแต แแแ แจแตแแ แแแแชแซ แ แแตแถ แแฅแ แแแณแต แ แฅแจแ แฐแแแแ። แ แฃแ แจแแฐแแแแฅแ แแฐแแน แฐแญแ แแแแ แฅแ แ/แแตแ
แ แ แญแ แซ แแ แญแ። แ แแแฃ แตแแแแแแ แจแแณแฐแซแ แตแณแญแดแแตแต แ แแแ แจแ። แฅแแแฑแ แฝแแณแแ แแฝแ แ แแแ แจแแ። แแ แญแ
แแ።
“แ
แฅ แ แแซแแแต แแแญ แแถ แแญแ แต แ แแฅแแแ” แฅแแณแแ แแญแแต แแ። แแแต แแแ แจแแชแแฑ แจแฐแแณ แ แฐแแซแฉ แฆแญแแถแฝ แแญแถ แจแธแธ፣ แ แ
แแแต แณแชแญ แแตแฅ แ แแชแแฑ แแณแแแ แตแแซ แจแซแ แแแฐแฅ แแ። แจแธแธแฃแธแ แฆแญแแถแฝ แแ แฅแแต፤
- แ 1969 แจแ แตแ แฆแแฌแฝแ แฆแญแแฑ แฅแแฐแฐแแแจ แแญแถ แจแธแธ፣
- แ 1970 แจแ แฒ แฐแฅแฎ แแญแถ แจแธแธ፣
- แ 1971 แแแแชแซ แแญ แจแแญแ
แแ แ แแแซ แแญแถ แจแธแธ፣
- แ 1971 แ
แณแญ แแญ แจแแจแต แแญ แฆแญแแต แแญแถ แจแธแธ፣
- แฐแ แแญ 1971 แจแแแจ-แฐแแ แแแซ แณแแแฉ แฅแ แแฌแต แแญ แฒแแจแฃแแ แ แ แ
แ แฐแญแ แฅแแฒแแแต แจแฐแฐแจแแ แแธแ። แ แแตแญแญแแต แจแฐแซแแฑ แจแฆแญ แ แแฅ แ แจแแ แ แญแ แจแแซแแแ แแณแญ แแ።
แ แ
แแแต แแตแฅ แแแ แณแแญแ แ แแซแญ แจแแซแแแ แแ
แ แ። แแณแฐแซแ แฅแ
แตแ แตแตแซแดแ แจแแฐแแ แฅแแต แฅแซแฐแจแ แแณแฐแจแ แ แตแตแซแฐแ แแณแฐแซแ แณแญแฒแญ แจแ แธแ แแฃแณ แแจแ
แ แ แแณแต แฅแแต แ แแซแแต แจแปแแ แซแแแ แฅแธแแ แ แจแแ แ แญแ แแ። แแแแ แแณแฐแซแ แ แแซแญ แตแจ แ แฅแญแ፣ แแจแแ แ แญแ แซ แแแฐ. แ แตแฐแแฎ แซแณแฐแแธแ แ แจแแ แ แญแ แแ። แตแจ แ แฅแญแ แญแแ แแแ แจแแฉแซแฉแ แต แแธแต แแ። แแซแ แ
แแแต แฅแตแจ แ แแ แจแแ แแแ แต แแณแฐแซแ แแ แ แ แจแแ แ แญแ แจแฐแแแ แฅแแ แแแต แแแ แฅแตแจ แฅแแฐ แแฑ แตแจแต แแณแฐแซแ แณแญแแต แญแแ แตแตแซแฐแ แจแคแ แ
แแฃแต แจแแณแญแ แฅแแแต แ แแแ แจแแ። แแแ แจแแแธแ แแแฑ፣ แแฅแ
แแ แจแแตแ แแญแแซแแ แ แตแแต แแแแ แ แตแแแแแ แจแแแณแ แจแแธแต แแแชแต แแ።
แแฐแญ แแญแ แฝแฎแ แจแ
แแแต แแฅแถ แแฐ แตแฐแต แฒแแต แ แ
แกแญ แแฅแจแชแณแ แแชแแต แฐแญแแแญแ แ แฐแ፣ แฐแปแ แฐแฅแจแฝแฎแแ แจแแฎ แฐแแตแพ แจแซแแแ แฐแแถแฝ แแ፣ แฅแฃแฝ แแจแแต แณแตแแญ፣ แ แซแญแแ แ แแแฐแต แฃแถ แฅแแ แฑแณแ แแฃ።
แ แจแแ แ แญแ፣ แ
แกแญ แ/แชแณแ፣ แตแฅแแต แแ፣ แ แญแจแ แฅแแฃแญ แแแ แแฅแ แแแณแต แฒแซแซแแฑแต แจแแ แจแแ แแณแฐแซแ แฅแแตแ แตแตแซแฐแ แจแ แธแ แแ แณ፤ แ แตแแแ
แแจแแถแฝ แแญ แ แฐแฅแ แแแญ แจแฐแแแ แ แ
แแ แแณแฐแซแ แแปแแแต แฅแฃแฝ แแจแแต แณแตแแญ แ แแแต แจแแณแ แชแซ แจแจแขแต แแแฐแ แจแแจแฑแตแ แ แณแแฎแฝ แ แธแญแแ แแแแต แแแ แ แตแจแจแกแต። ‘แ แฐแ แฐแแฐแต แ แญแ แฌ แฐแแฐแฐ’ แฅแแฐแฐแฃแแ፣ แแแต แแแ แฃแแฐแซแแ แ แแซแแแ แแณแฐแซแ แตแตแซแฐแ แจแ แธแ แแ แณ แแตแ แแณแฅแ แ แจแแ แ แญแ แฐแญแ แซแแแแ แแ። แ แแ แแซแ แจแแ แแแ แต แแณแฐแซแ แ แซแแต แจแ แจแแ แ แญแ แฅแซแ แฅแแต แแ። แฃแแฐแซแธแ፣ แ แแณแแแ แฅแ แฅ แจแซแตแ
แ แตแแตแแ
แแ แแ แซแตแแแ፣ แซแแญแณแ። แตแแแ
แแแตแ แจแ
แแแต แแแ แแธแณแแ แ แแ แแญแแต แตแ
แตแ
แจแแธแต แจแแ แฅแแฐแฐแแแแ แแแแณแธแแ แฅแแฒแซแแ แญแ
แแ แจแฝแแ แฐแแต แซแแฅแก።
แจแตแฅแแต แแ แแญแถ แแแช
แแฐแ แฅแ แ แฐแ
แแต-แ
แแแต แจแแ แจแ แจแขแตแฎแตแซแแซแ แ แแซแญ แแ แญ። แฅแ แ แถ แแฐแฐแ แ แจแ፣ แ แแ แ แแฐแฐ፣ แแด (แแแช) แฐแญแ፣ แ แฝแฅแ แณแแ፣ แถ/แญ แ แณแญแแต แแธแ แ แแ แแญแแซแต แ แแ แแด แฅแแฐแแฐแแธแ แ แตแญแญแ แ แตแแแฌแแแ። แ แจแซแฒแต 1981 แ แแ
แฑ แจแขแตแฎแตแซ แแแแฅแต แจแแ แจแ แฐแญแ แตแแซแญแ แแ แแแฃแฑแ แฐแจแตแ แแซแ แ
แแแต แซแแแแ แแแซแ แแฃ แแจแต แตแแซแญแ แฐแแฃแ แจ። แแ แญแ
แแ፣ แ 1983 แ แแต แแแทแธแ แ แฒแต แ แ แฃ แแ แฅแแ แขแตแฎแตแซแ แฅแแฐแฐแแฃแ แฉ፣ แแฅแฐ แแณแฉ แตแฅแแต แแ แ แแญแถ แแแชแแต แฐแฐแแซ። แจแถ/แญ แ แณแญแแต แแธแ แแแ
แ แฃแต แจแแแญแ แต แคแต แ แแแตแ แฅแซแฑแ แ แแตแฐแแแ
แจแถ/แญ แ แณแญแแตแ แแต แแแซแธแ። แ แ แจแแ แ แญแ แฅแแฐแฐแแฐแ แฒแแแซแธแ፣ แ แจแแ แ แญแ แจแแ แแ
แแ แฅแแ แฒแ แญแแต፣ แจแแแแแฝ แ แญแ แแฅแจแแญแซแ แแ แฒแแธแ፣ แจแแ
แ แแฅแ
แแแด แแ
? แฅแแ แ แจแแต፣ แ แแ แ แแธแ። แจแ
แญแฅ แแแตแ แแแ แแฐแแ? แฒแแต፣ แ แ แจแแ แแแฐแแ แฅแแ แแแแ แณแญแแแซแธแ แแญแถแแ แ แฐแแถ แฐแฐแแ แฐ። แ แ
แฎแแต แแธแแ แ แแแฑแต แแแธแ แแญแถ แจแฐแแณ แณแแ แจแฅแ แตแแญ แ แแ แจแแ
แแแ แ แแต แฐแแฉ።
แตแฅแแต แแ แญแ
แ แแ แแแ። แ แตแ แ แถ แณแแ แ/แฅแแด แคแต แฐแจแต แ แแแต แจแ แฝแฅแ แณแแ แแแ
แฅแแตแ แ แ
แแ แคแฐแฐแก แฃแแ แต፣ แ แ แญแฅแฎแต แฐแแฅแแ แคแต แซแแซแแ แจแแ แแต แ แแ፣ แฅแแฑ แ/แฎ แแ แฐแแช แแ ‘แแ’ (แจแคแต แตแ) แฅแแฃแธแแ แฅแซแแฐแฑ፣ แแ แ แแฅแ፣ แจแแณแแแ แแแญ แ แ แแญ แฅแแ แฒแ แญแแต፣ แตแฅแแต፣ แ แฝแฅแ፣ แฐแแต แฐแแตแ แจแแฐ แฅแ แแแต แแแณแ แ แแธแ። แ แฃแตแจแ แแ แ แ แตแญแแ แฅแแดแต แแฐ แฒแแต፣ แ แจแแ แ แญแ แแฐแแ แ แแธแ። แ แจแแ፣ แจแ/แ แ แญแ แ/แแญแซแ แแ
? แฅแแ แฒแ แญแแต፣ แ แแ แ แแธแ። แซแณแฐแแ แแแตแ แแฐแแ? แจแ แฝแฅแ แณแแ แฅแแต แ แแ
แฐแแแ แ แณแแ แ แแแ แ แฝแณ แฐแฐแแญแฐแ แแฑ። แฝแแแแ แ แถ แณแแ แ/แฅแแด แ แแแ แ แแญแแต แ แ። แจแถ/แญ แ แณแญแแต แแธแ แแแ
แ แฃแตแ แ แแญแถแ แแญแแซแต แณแแ፣ แซแต แแญแ
แแ แฅแแณแ แแฑ። แ 1998 แจแแแฑ แคแฐแแตแฆแฝ แตแแญ แ แแฅแณ แแฐ แฅแ แฐแแแแแ แฐแแแแจแแ። แ แแ
แแณแฅ แแญ แฅแแณแแ፣ แจแถ/แญ แ แณแญแแต แแธแ แแแ
แ แฃแต แ แ
แฎแแต แแธแ แฅแฉ፣ แแแ
แฅแแฑแ แจแฅแ แจแแ
แฝแแ แ แ
แซแข แ/แแตแ
แ แ แญแ แซ แแแ
แฅแแด แ/แฎ แ แธแฐ แแฅแฉ แฅแแต፣ แจแแแฑ แฅแแถแฝ แณแแ
แ แณแแฝ แจแ แแต แ แฃแตแ แฅแแต แแแฝ แแธแ። แ แแ
แแฐแจแต แแ แจแถ/แญ แ แณแญแแต แแธแ แคแฐแฐแฆแฝ แ แจแแ แ แญแ แ แแ แแญแแซแต แฅแแฐแแฐแแ แจแ แจแแ። แฅแแ แตแฅแแต (แ/แฅแแด) แแ แจแแแซแฝแ แแธแต แแ። แถ/แญ แ แณแญแแตแ แจแแฐแแ แตแฅแแต แแ แแ፣ แ แแแต แ แฝแแ แฅแแฐแแแฝแฉแต แตแแแซแธแ แ แแแแ แฐแแซแซแ። แซแแแ แแญแแซแต แจแ แณแญแแต แแแฐแ แแฅแแ แจแแฐแแ แแญ แฅแแฐ แฅแแฑ แตแแแ แแ። แแฅแแ แแแฑแ แแแตแแฝแ แแ።
แแฅแ แจแตแแฝ แแซแต แ แแ แ 1998 แจแ แฝแฅแ แณแแ แคแฐแฐแฅ แแแตแ แจแฅแแแแ แแแญ แฐแแแแ። แ แฝแแ แฅแแณแตแแแฅแฉแต แแแฌแแต แ แแ
แถแ แ แฝแแแผแ แฐแแซแจแ። แแฅแ แแแแฐแ แแ แ 2000 แแแตแ แฐแแแแ፣ แซแแจแฅแฉแแตแ แแ แฅแแณแ แ แแ แฐแแ แแ። แแแ แซแแจแ แแ แฅแซแ แคแฐแฐแฆแผ แ แ แจแแ แ แญแ แ
แฌแณ แ แตแฎแฃแธแ แแ แญ፤ แ แแ แ แญแแต แญแ
แญแณ แแ แญแแ፣ แฅแฃแญแ
แแแญแแ แฒแแ፣ แจแแ แจแแ แฃแแฐ แแ แแแ แซแแ แต แฅแฌแ แฅแแฐแแฐแแแแต แแแฎแ แฐแฐแแฃแ แตแ። แ แจแแ แ แญแ แแแต แซแแฐแ แ แฅแแแต แ แ። แจแ
แแแต แแฎแแซแแ แฝแ แ12 แแแต แ แจแแฐแ แ แแซแญ แแญ แแ แซแตแฐแณแฐแจแ แตแญแ
แต แแ። แแแ แจแแซแแแ แจแตแญแ
แฑแ แแแแแฝ แ แแญแแญ แซแแแ። แ
แแแต แ แฅแแฃแ แแญ แแ แแแธแแ แแ แฐแ แซแ แฅแแณแญแแ แ แจแแ แ แญแ แ แแฃแแแ แฐแ แ
แ แแซแแ แแแแฅ แ แแ แต።
แฅแ แตแฅแแต แแ፣ แแแต แแแ แแแฐ. แ แตแแ แแ แจแฐแแฐแแต แณแแฎแฝ፣ แฐแแแ แแแฝ แ แตแแต แบแ
แจแแแ แฉ แแธแ። แจ1982 แ แแแป แแแญ แฐแแตแฐแ แซแตแแแตแ แ แจแแ แ แญแ แฅแแฐแแฐแแธแ แ แตแญแแ แตแแ แ แญแ แแแญ แ แฅแแฐแแณแ፣ แ แแแ แฅแแฐแแ แแ แต แแ። แจแ
แแแต แ แฃแแตแ แฐแแแแน แฅแตแจ แ แแ แฅแแ แจแแแ แ แจแแ แ แญแ แแ แฅแซแ แญแแแ። แฅแฑแ แญแ
แแ แแแญ แ แตแญแญแ แซแแแ። แ แจแแ แจแแแแ แจแแแแฐแ፣ แแตแจแแฝแแ แ แ
แญแก แฅแซแ แแ። แญแ
แ แฃแฅแ แแ แตแญแญแ แ แญแฐแแ። แจแแแต แขแฎ แ แฃแแต แแ แ แจ06 แแแ แแซแ แฅแจแฐแ แฐแ แแแฅ แจแจแจแฑแต แ แแซแฉ แแธแ። แ 06 แแแ แแซแ แแแแแฝ แจแแญแแซ แชแแญแต แญแแ แแญแต แฒแฐแฅ แจแแ แจแ แ แแซแญ แแ። แ แฐแแต แฐแฐแแ แจแแแธแ แแฐแแธแ แจแแ แตแฅแแ แ แฐแ
แแต-แ
แแแต แ แฐแซแญ แ แญแณแแ
แ።
แฅแ แตแฅแแต แแ แ แ แจแแ แ แญแ แแญ แจแแซแซแแฑแต แจแตแ แแฅแแต แฅแแฃแต แแแแต แ แแ แต แจแแ แแณแฅ แฐแแตแผ แแแขแต 2 แแ 2000 แ แแแ แแชแซ แจแแแฉ แขแตแฎแตแซแแซแ แจแตแแซแญ แฐแแแแฝ แแ
แ แญ፣ แ แถ/แญ แแฐแญ แ แฐแ แแแแแ แญแแต፣ แ แ แถ แฐแตแแจ แ แฝแฅแ แจแแแซแ แกแตแ แ แฐแ แแฐแ แแ แฐแฐแ แฐแ ። แแ แจแแ แ แญแ แซแแจแฅแฉแต แแณแฅ แ แฅแ แตแฅแแต แแแ แ แแซแ แตแญแแต แตแแ
แฅแจแ แ แแ። แ แแฐแ แ แแแแชแซ แแตแจแ แซแแฅแ
แจแขแตแฎแตแซแ แแแฅ แญแ
แญแณ แ แญแแ
แ แ
แแแต แจแฐแแธแแตแ แแแแแฝ แแแแฅ แ แ
แญแฅ። แซแ แตแณแฐแญแ แจแ แฅแแฎ แฅแจแแต แณแแแแ
። แ แ
แแแต แ แญแซแณแ แจแฃแต แแแแแฝ แฐแแฝแแแ። แจแขแตแฎแตแซ แแแฅ แญแ
แญ แฃแญ แแ แจแแ แแณแฅ แ แแจแฅแฉแแต። แ แแ
แฑ แจแแ แฉ แ แแซแญแ แ แดแ แฎแแแจแแต แจแแ แฉแต แจแแแฐแญแฉแต แแณแญ แแ። แ แจแแ แ แญแ แแแ แฐแแญแจแ แฅแ แฅแ แฐแแแจ። แแ แแแฉ แดแ แฎแแแจแแต แ แแแ แแ แฅแแ แ แ แซแ แ แ แแก แฅแแ แแฎ แจแแแฆ แซแ แแ แแ แญ። แจแแแฝแแ แแแแแต แจแแ
แแ แ แแ แฐแแจแ ። แฅแฉ แแญแญ แ แแแแด แ แแต แ แแซแ። แจแแจแซแ แจแฝแแญ แแ แแแตแแ แ แแ። แญแฃแต แฅแ แจแ
แแแต แ แแตแ แฝแแแแฝ แ แแแต፣ แ แตแแฐ แ/แฅแแดแ แฅแ แฅแ แ/แแตแ
แ แ แญแ แซแ แแจแแ። แญแ
แ แแแแฑ แฅแ แจแฐแ แแตแญแฎแฝแต แ แแ። แจแฐแแจ แฐแ แแ። แ แ
แแแต แแตแฅ แซแแ แ แแซแญ แแ፣ แจแตแแ แแแแชแซ แ แแตแถ፣ แฅแ แแแแ แแฝแแ፣ แ แแแธแ แแญแ แแ። แตแแแ
แแแ แ แแซแญ แฅแ แแ แแ แจแแ แซแ แฐแณแตแทแ። แแญ แฅแแฐ แแฐแญ แแญแ แฝแฎแ แฅแแฐแ แแ แฅแ แฐแแแ แฅแแฐแแแแจแ แแแแ แญแ
แแ แ แญแ แซแแต แแจแฐแ แ แแ แต።
แแต แขแตแฎแตแซแแซแ แจแ
แแแต แณแชแญแ แฅแแแแ แจแแแต แฝแแแผ แ แแแ
แต แแญ แแธแ። แ แฅแแต แแซแต แแตแฅ แแแแฅ แญแแญแฃแ แจแแ แฝแ แฅแแแต แ แแ። แถแตแฐแแ แฝแแ แฐแแ “แฐแ แซแแแน แฅแแแ แแธแ” แญแแแแ แ แแแแแต แแญ แแ። แจแแแฅแต-แฐแแ
แต-แ
แแแต แจแแก แ แแซแญ แ แแต แ แ แแต แแ แฐแฉ፣ แ แแแต แญแ แจแแ แจแแแ แฐแแ แแแฝ แแฝแแ แฅแจแฐแแแ แแ።
แแณแฐแขแซ፡ แ แตแ
แจ แแฝ แจแแตแฐแแแแธแแ แฝแแแฝ แขแตแฎแตแซแ แแ แ แแฐแ แฐแฅแตแฃแฝแ “แจแ
แแแต แแ แ” แ แแแต แ แแ
แฐแญ แ แ แซแ
แแต። แฅแฉ แจแฐแแต แแตแจแ แแ። แจแ
แแแต แ แแซแญแ แซแตแฌแแน แ แแแฅ แจแแแจแฑแ แต แแ แฐแญแทแ።
แแฅแจแแตแ
แ แ แญแ แซ
แ
แแแต แ แขแตแฎแตแซ แแแฅ แแญแ แญแฐแแฐแณแ!!!
แ แแตแตแซแแซ
2006 แแ แจแแปแแต แแแต แแต!!!
แแตแจแจแ 6 แแ 2006
แ แตแญแแฑ แฐแฃ แฅแจแแซแจแฐแฝ แตแแแฝแ แแแซแฝแ
